Tempora prisca Deus decorans pie lampade celsus

      Celsus adauxit herus tempora prisca Deus.

Empta soli pretiis pollent ut stemmata gemmis,

      Vota nitent meritis empta soli pretiis.

5

Mira studentque rosas quo pendere lilia gratas

      Carpere caeligenas mira studentque rosas.

Principe principio sic cosmus splendet et alto

      Sancta micant deico principe principio.

Optinuere chori patrum primordia celsi

10

      Anteriora boni optinuere chori.

Recta canens agio venit hinc vatum chorus agno,

      Flamine fert populo recta canens agio:

"Agie, sancte, sacer," qui promunt ore patenter

      Rite boant iugiter: "Agie, sancte, sacer."

15

Primus apostolicus trabeatus et indusiatus

      Considet et cuneus primus apostolicus.

Romphea colla vomens rubicundat martires ardens

      Sanguine fusa videns romphea colla vomens.

Iam sacra virgineas excellit turma coronas

20

      Famine perspicuas iam sacra virgineas.

Sancta sacrans digitis rutilat nam contio sacris

      Ferta cibi calicis sancta sacrans digitis.

Conmoriendo Deo gladios praetendit Olimpo,

      Pace quiescit humo conmoriendo Deo.

25

Astra rubens superas, Eparchi sanctus, adornas

      Consotiusque beas, astra rubens superas.

Divitias domini quia tempnis, munere Christi,

      Nunc capis altithroni divitias Domini.

Es quoque pauperiem locuples sectatus ob arcem,

30

      Vectus ad unanimem es quoque pauperiem.

Vir pius ac rutilis virtutum dote manebis

      Omnibus alme bonis, vir pius ac rutilis.

Stare sciens inopi miserator, mitis Eparchi,

      Es vice Paracliti stare sciens inopi.

35

Dulcis amorque bonis renites dulcorus alumnis,

      Affluis ut genitis dulcis amorque bonis.

Exigis ob titulos morum procedere comptos

      Per pie sanctificos exigis ob titulos.

Cerberus intremuit, letoque datos tibi reddit,

40

      Qui tua iussa facit, Cerberus intremuit

Obtenebrata fugas, palponibus ac via constas,

      Fulgida lucis amas, obtenebrata fugas.

Rectius, arthetrici, salientes curritis ipsi,

      Itis ad omne citi rectius, arthetrici.

45

Artubus unicolor data fit cui morbus oletor

      Grex, cane: "Laus et honor," artubus unicolor.

Nacta super numerum meliusque caterva virorum

      Agmina s. medicum nacta super numerum.

Sic, Egolisma, places, tanto cum numine fulges,

50

      Propter eum toties sic, Egolisma, places.

Plusque vales meritis sancti quam turribus altis

      Eparchii innumeris plusque vales meritis.

In fidei radiis adit hinc tumulum sibi quisquis

      Ops datur omnimodis in fidei radiis.

55

Egregia egregii qui visit membra patroni,

      Vota feruntur ei egregia egregii.

Laetitiae sotium sotius deprehendit amicum,

      Cor hilaratque pium laetitiae sotium.

Aura polosa soma simul hac iubilant medicina

60

      Commoditate data aura polosa soma.

Mitis Eparchi decens Christo proferre clientes

      Sint bonitatis ames mitis Eparchi decens.

Pontus et ima reos affligunt crimine mersos

      Quos videant superos pontus et ima reos.

65

Abside fulminea nimbis iactamur et una,

      Nos tege sed galea abside fulminea.

Dicere nosque iuvat nebulones: "Vmbra recaecat,

      Gloria, lux veniat," dicere nosque iuvat.

En dominare tuae propriae per cuncta caterve,

70

      Poscimus, ecclesiae en dominare tuae.

Crescat ut altus amor, societur caelicus ardor,

      Esto salus et honor, crescat ut altus amor.

Exue nos maculis, renova virtutibus almis,

      Alme, tuis meritis erue nos maculis,

75

Luxque tuis sophiae sit collatrix facis almae,

      Eniteat deicae luxque tuis sophiae.

Sontia, prava fuga, crudelia, mollia, pigra,

      Lurida, pestifera, sontia, prava fuga.

Vnanimes Domino compone perenniter alto,

80

      Fac, bone, celsithrono unanimes Domino.

Scandere regna poli rogites nos, pastor Eparchi,

      Consule macte gregi scandere regna poli.

Almus Eparchi Deo nimium quo splendide DaviD

      Dignus eon policA Doctilogus patriA.

85

Ecce tuam merito nequimus tangere laudeM,

      Mire patrone magE Multisona que chelE,

Almipotens tuus est cumulus, nam laudis et aggeR

      Regnat ubique piA Rex bene iustitiA,

Vnde pater sua laus es, Eparchi beate, resultanS,

90

      Sidereusque sitV Stellifer in habitV.