Quisquis es hunc cernens titulum, dic pectore puro:

      Sit requies illi, lector opime, precor.

Te precor, omnipotens quadrati conditor orbis,

      Dungalus ut vigeat miles ubique tuus.

5

Atque suum iugiter defendas corpus in aevum,

      Ne lupus incautus dilacerare queat.

Sidereum ut valeat rite conprendere Olimphum,

      Cum sanctis vitam participare queat.

Querere divinum non cessat nocte dieque

10

      Auxilium, ut possit vincere cuncta mala.

Divitias varias tempnit mundi perituri,

      A mundi curis libera corda vehit.

Atque regit propriam iusto moderamine carnem,

      Pro carnis vitio ne pereat anima.

15

Mortiferasque rogat mundi contempnere pompas,

      Caelestis regni querere lucra rogat,

In domini meditans toto conamine lege,

      Et servit domino mens pia iure suo.

Discipulos proprios inlustrat lumine sacro,

20

      Ceu posita in celso clara lucerna loco.

Scripturas promit casto de pectore sacras,

      Edocet infirmos et validos pariter.

Lacte rigans pueros et dat capientibus escam,

      Hinc lac ut capiant, inde cibum pariter.

25

Ceu pia mater alit natos cum mente benigna,

      Aescam grandevis, lac rudibus tribuens.

Plura quid enumerem sanctis virtutibus istis,

      Dicere quas nequeo, scribere nec valeo.

Pectore si fluerent verba ceu flumina nostro,

30

      Nec sic sufficerem digna referre tibi.

Sis sanus, vigeas, opto, per tempora longa,

      Perpetuam requiem det tibi, posco, deus.

Volvitur incertis mundus cum casibus iste,

      Et genus humanum pessima mors perimit,

35

Cum venit extremum, nil prosunt tempora longa,

      De mortis nullus lege solutus adest.