Hanc tibi victricem, dux inclite, sume coronam,

      Intextam sertis floribus et variis,

Luceat ut vestro fulgens in vertice semper,

      Divina exornans tempora et omne caput,

5

Optatum adducens domini sublimis honorem,

      Altithroni genitor, qui ethere sceptra tenet.

Rex regum et summus princeps, dominus dominantum,

      Dispositor sapiens, conditor architenens,

Omnia qui superat, replet, sustentat et ambit,

10

      Denique cuncta regit, prava sed ipse domat;

Vnus ubique deus, sancto spiramine fulgens,

      Numine qui proprio cingere cuncta valet;

Gloria summa potens, retinent quam septaque nulla,

      Aera, terra, polus, tartara nec pelagus;

15

Laudibus inmensis quam milia sancta celebrant

      Votiferae plebes et chorus angelicus;

Sanctus amore pio sanctus super omnia sanctus,

      Trinus ubique deus semper et unus adest.

Versibus his vestram obtamus vegitare salutem:

20

      Exiguum et famulum commemorare tuum.