Metellus Quirinalia 4a

Reference basis text: P. C. Jacobsen, 1965

Other sections


O regum fortunatissime, ter quaterque fauste,

Polum tenes iam septies beate,

Ius celeste recepisti, tibi debet urbs honorem

In omne tempus laude sempiterna.

5

Celis extulerat reges sub opinione fame,

Adaucta quorum creverat triumphis.

Quid dignum poterit tandem tibi gratie referre,

Nove dabit quem dignitatis arcem?

Tu regni fines super ethera victor extulisti

10

Reique tantum publice dedisti,

Quod prius in terris reptans super astra verticem fert,

Prius per arva lata, nunc in alta crescit,

Robore devincens omnes nisi se peremerat se,

Tuo ducatu fit valentior se,

15

Que princeps pacis sine sanguine novit imperare,

Vt ante terre, nunc potens polorum.

Quo feror, heu migrat quo gloria principalis illa?

Fugit caducis et petit perennes,

Invidiam virtus diram comitem perosa liquit

20

Et emule cor perforans abivit.

Aspernata polo superevolat ad patrem supremum,

Sedet quieta nec memor malorum.

Decius excellente viri probitate vulneratus

Tyrannicam vim colligit perarmans

25

Ac maiestatis caput imperiale mersit umbris.

Deum fidelis spiritus revisit.

Vrbs Verona patrem, cesum manibus feri latronis,

Remisit astris celitus beandum.

Nominis et regni par filius eius urbe Roma

30

Sinu parentis scilicet peremptus,

Martyrii celsa comis sequitur patrem corona.

Vterque palmam sic adeptus almam

Vrbi quesitos firmat patrie lares superne.

Habent perenni luce mansionem

35

Et titulum proprio de sanguine purpurante scriptum

Ibi revelant curie beate,

Quem regi regum nunc pro populi salute pandunt

Periculisque consulunt suorum.

Civibus equis testamenta suo labore parta

40

Perennis evi non sinunt resolvi.

Horum sceptrigera de stirpe resedit aureus flos

Quirinus, infans septimum sub annum

Etatis crescens et congenitus throno paterno.

Sibi recondit hunc Deus pusillum;

45

Servans tutamen patrie miseris dedit levamen,

Quiritibus qui dux fide fuisset,

Nobilium Romana tribus sequeretur ut propinquum

Fidesque digno teste vera firmet.