Mars obit in terris, deflent par sidera sidus,

      Numina par numen, queque decora decus.

Res noua! temporibus moriuntur numina nostris,

      Amodo credibile est numina posse mori.

5

Vnicus ille ruit, cuius non terga sagittam,

      Cuius nosse pedes non potuere fugam.

Expedit esse uirum quociens ad bella uenitur,

      Huic satis in bello non fuit esse uirum.

Nil nisi fulmen erat, quociens res ipsa monebat,

10

      At si non fulmen, fulminis instar erat.

Flandria se tumulo iactet, Normannia cunis,

      Occasus fuit hic sideris, ortus ibi.