Plaudit humus, Boree

Fugam ridens exulis.

Pullulant arboree

Nodis come patulis.

5

Gaudet Rea coronari

Nouis frontem flosculis,

Olim gemens carcerari

Sui seuis vinculis.

Felix morbus, qui sanari

10

Nescit sine morbo pari!

Ethera Fauonius

Induit auiculis.

Ornat mundum Cyprius

Sacris dium copulis.

15

Castra Venus renouari

Nouis ouat populis

Et tenellas populari

Blandis mentes stimulis.

Felix morbus, qui sanari

20

Nescit sine morbo pari!

Tuum, Venus, haurio

Venis ignem bibulis.

Tuis, Flora, sicio

Fauum de labellulis.

25

Flora, flore singulari

Preminens puellulis,

Solum sola me solari

Soles in periculis.

Felix morbus, qui sanari

30

Nescit sine morbo pari!

Rapit nobis ludere

Dictis liuor emulis,

Nos obliquis ledere

Gaudens lingue iaculis.

35

Nolo volens absentari,

Votis vror pendulis.

Fugi, timens te notari

Nigris fame titulis.

Felix morbus, qui sanari

40

Nescit sine morbo pari!

In discessu dulcibus

Non fruebar osculis.

Salutabas nutibus

Pene loquens garrulis.

45

Fas non erat pauca fari.

Fuere pro verbulis,

Quas, heu, vidi diriuari

Lacrimas ex oculis.

Felix morbus, qui sanari

50

Nescit sine morbo pari!