De grege pontificum

Vix est preter vnicum

Dignitate dignus,

Cui nil tuto creditum,

5

Cuius fides hospitum

Solet esse pignus.

Minorum non minimus,

Cuius vox et animus

Nil habent commune,

10

Nec in se rem presulis

Nec habet in loculis

Graciam fortune.

Solus habet criminum

Quicquid in tot hominum

15

Mentes est diffusum.

Omnibus abutitur,

Que creasse legitur

Dominus ad vsum.

Seruus gule pocius

20

Quam nature filius

Sumit, vt consumat

Contra ius et ordinem,

Quicquid in libidinem

Forcius despumat.

25

Sitim temulencia,

Vomitu conuiuia

Non sat est finire:

Set, cum languet ebrius,

Vt repotet, pocius

30

Sitit resitire.

Cum apponi faciat

Sibi, quod sufficiat

Tribus Epicuris,

Cuncta passim demetit,

35

Nisi quod plus appetit

Ea, que sunt pluris.

Inuitatur precio

Venter in conuiuio,

Venus in cubili.

40

Et hoc empto carius

Delectatur amplius

Quam hac merce vili.

Postquam madet bibulus

Tunc deducet oculus

45

Exitus aquarum.

Extunc nec discrecio

Sexus nec excepcio

Fiet personarum.

Quis vel que sit obuiam,

50

Propter conscienciam

Non interrogatur.

Nil intactum preterit;

Quod se prius ingerit,

Prius occupatur.

55

Totus est venerius

Nec cursum alterius

Sequitur planete.

Totus est libidinis;

Hinc tota lex hominis

60

Pendet et prophete.

Si denominacio

Fiat ab officio,

Quod sit omni mane,

Deputare poteris

65

Septem dies Veneris

Omni septimane.

Cui si forte predices,

Quod debent pontifices

Esse luxu puri,

70

Id habens pro friuolo

Mauult cum apostolo

Nubere quam vri. /

Set si dicas "contine,"

Dicet: "In volumine

75

Pauli continetur

Non, vt quis contineat,

Set, vt suam habeat,

Cum qua fornicetur."

Vt aperte liqueat,

80

Hic in quo premineat

Ceteris et quantum,

Plures quidem pluries

Mentitos inuenies,

Set hu<n>c semel tantum.

85

Tot se modis protheat,

Vt modum non teneat.

Nam lesurus lenit

Et mulcet, vt mulgeat.

A quo, nisi veneat,

90

Gracia non venit.

Videt hu<n>c domestica

Sedulum, dominica

Mensa negligentem

In qua non diiudicat,

95

Quam nocens sacrificat

Sacrum innocentem.

Quem nil eque piguit,

Quam quod non interfuit

Illi iudicando,

100

Quem et Iudas vendidit

Et Iudea tradidit

Iudici nefando.

Tanto ducit tedio,

Tanto premit odio

105

Studia virtutum,

Acsi totis studiis

Totam vitam viciis

Soluat in tributum.

Cum sit fraudis laqueus,

110

Viciorum puteus,

Sordium lacuna,

Quot in mare flumina

<Tot in eum crimina>

Confluxerunt vna.

115

Pacem lite dirimit,

Innocentes opprimit,

Releuat nociuum.

Ius omne defederat,

Naturale temerat,

120

Spernit positiuum.

Fit ius ex iniuria,

Postquam iudex recia

Laxat in capturam,

Et olfacto munere

125

Facit condescendere

Censui censuram.

Quem non reddat stupidum?

De viru quot aspidum,

De quot viciorum

130

Prodiit visceribus,

Malis peior omnibus,

Pessimus peiorum?

A me si requiritur:

"Quis est, qui sic dicitur

135

Mendax et mendosus?"

Oblitus sum nominis,

Qula nomen hominis

Est "Obliuiosus."