Obtinente monarchiam

Cesare secundo

Humanata per Mariam

Lux refulsit mundo.

Irrigata per Helyam

Tellus rore mundo

Preparavit vite viam

Germine fecundo.

Virga pigmentaria,

Magni Ioseph horreum,

Cuius dant cellaria

Vinum, mel et oleum.

Approbatis approbatur

Dignitatis mire

Dies, in qua se dignatur

Deus inanire.

Hec est dies, quam cupivit

Abraham venire,

Quam Iudea quia scivit,

Meruit nescire.

Virga pigmentaria,

Magni Ioseph horreum,

Cuius dant cellaria

Vinum, mel et oleum.

De quo dicit Ysayas:

"Custos, quid de nocte?"

Verus custos et Messyas

Iesum sanat docte.

Carnes agni comeduntur

Igne crucis cocte.

Tue faces extinguntur,

Coluber indocte.

Virga pigmentaria,

Magni Ioseph horreum,

Cuius dant cellaria

Vinum, mel et oleum.

Vetustatis prime zyma

Minabatur mortem,

Et fovebat capax rima

Demonum cohortem.

Factor factus est factura

Iuxta nostram sortem

Et refregit armatura

Fortiore fortem.

Virga pigmentaria,

Magni Ioseph horreum,

Cuius dant cellaria

Vinum, mel et oleum.