Frigescente caritatis

In terris igniculo

Vniverse vanitatis

Fons inundat seculo,

Brevi sub articulo

Audietur vastitatis

Gemitus in populo.

Iuvenes ... transeunt

Limites illiciti,

Senes et decrepiti

Modum <iustum> nesciunt,

Tenere lasciviunt

Quasi modo geniti.

Ecce florent venditores

Spiritalis gratie,

Antichristi precursores;

Presides ecclesie,

[Columbarum distractores,]

Fures eucharistie,

Tui, Iuda, successores,

Christum vendunt hodie.

Iuvenes ... transeunt

Limites illiciti,

Senes et decrepiti

Modum <iustum> nesciunt,

Tenere lasciviunt

Quasi modo geniti.

Martha foris occupatur

Querens lucri gratiam,

Soror Marthe contemplatur

Nummos et pecuniam,

[Vera fides enervatur,]

Itur in perfidiam,

Aurum Christi conculcatur,

Versum est in scoriam.

Iuvenes ... transeunt

Limites illiciti,

Senes et decrepiti

Modum <iustum> nesciunt,

Tenere lasciviunt

Quasi modo geniti.

In preclaris ceciderunt

Christo funes primitus,

Nunc preclara viluerunt,

Nam letalis ambitus,

Quem pastores incurrerunt,

Et infamis cohitus

Caput gregis everterunt

Et pedes radicitus.

Iuvenes ... transeunt

Limites illiciti,

Senes et decrepiti

Modum <iustum> nesciunt,

Tenere lasciviunt

Quasi modo geniti.

Hoc sancivit mos Romanus,

Hoc decretum legitur,

Quod sit presul vel decanus

Is, a quo plus dabitur,

Ergo recte dicitur:

Roma quasi rodens manus,

Per quam mundus roditur.

Silent leges, iura tacent

Nullo fulta stipite,

Luxus et rapine placent,

In hoc mundi tramite

Errat plebs cum milite

Lapidesque sancti iacent

In viarum capite.

Novitatis signum mire

Est in causa Romuli:

Si vis recte definire

Circulum quadranguli

Ratione calculi,

Rome potes invenire

Quadraturam circuli.

Bursa quadri est figura

Circulus denarii,

Quem dum bursat quadratura,

Signum est indicii,

Quod patres et filii

Solidantur hac usura

In fermento veteri.

Zima vetus impinguatur,

Dilatatur penitus,

Roma donis fermentatur

Reprobatis celitus,

Ruat ergo funditus,

Nullis enim gratis datur

Donum sancti spiritus.