Illic forma rosae, picta fideliter,

A vera facie devia paululum,

Aequabat proprio murice purpuram,

Telluremque suo sanguine tinxerat.

5

Concludens sociis floribus, adfuit

Flos illic redolens gratus Adonidis,

Argentoque suo nobile lilium,

Praedicabat agros, imaque vallium.

Illic ore thymus disparere disputans

10

Certabat, reliquis floribus invidens

Narcissi sociis flore, iocantia

Ridebant tacito murmure flumina.

Vultu florigero flos aquileius

Florum praenituit lucifer omnium,

15

Vernalisque loquens temporis oti

Stellabat violae flosculus arbuta,

Picturae facies plena favoribus:

Hic florum speciem vivere iusserat

Quae regalis erat chartula nominis,

20

Scribentisque tamen nescia pollicis.

Hae sunt veris opes, et sua pallia,

Telluris species, et sua sidera,

Quae pictura suis artibus edidit,

Flores effigians arte sophistica.

25

His florum tunicis prata virentibus

Veris nobilitat gratia prodigi.

Haec byssum tribuunt, illaque purpuram;

Quae texit sapiens dextra favonii.