1

Festum nunc celebre magnaque gaudia

Compellunt animos carmina promere,

Cum Christus solium scandit ad arduum

Caelorum pius arbiter.

2

Conscendit iubilans laetus ad aethera,

Sanctorum populus praedicat inclitum,

Concinit pariter angelicus chorus

Victoris boni gloriam.

3

Qui scandens superos vincula vinxerat,

Donans terrigenis munera plurima,

Districtus rediens arbiter omnium,

Qui mitis modo transiit.

4

Oramus, domine, conditor inclite,

Devotos famulos respice, protegens

Ne nos livor edax daemonis obruat,

Demergat vel in inferos.

5

Vt cum flammivoma nube reverteris,

Occulta hominum pandere iudicans,

Ne des supplicia horrida noxiis,

Sed iustis bona praemia.

6

Praesta hoc, genitor optime, maxime,

Hoc tu, nate dei et bone spiritus,

Regnans perpetuo fulgida trinitas

Per cuncta pie saecula.