Ad Ruth festinat Petri stilus, huius ut actus

      Depingat tenui carmine sermo breuis.

In terram Iude sub quodam iudice plebem

      Confundens cepit egra uigere fames;

5

Hac urgente fame timet Elimelech, fugit, exit

      De Bethleem, remanens in regione Moab.

Vxor adheret ei Noemi, puerique gemelli;

      Hic Maalon, Chelion ille uocatus erat;

Sed uir ibi Noemi uiduam moriendo reliquit

10

      Cum pueris; sponsam duxit uterque puer.

Dicitur hec Orpha, Ruth dicitur illa, decemque

      Post annos sponsis mors uiduauit eas.

Effundit lacrimas, profert suspiria natis

      Orba suis mulier et uiduata uiro;

15

Has lacrimas redimit ridentis gratia fame

      Que terram Iude narrat habere cibos.

Ergo redire parat, redeuntem gente relicta

      Ruth sequitur quamuis illa resistat ei.

Hanc licet impediat Noemi iubeatque reuerti

20

      Ad populum, tamen hec instat et inquit ei:

"Ad quemcumque locum disponis pergere pergam;

      Qui Deus aut populus est tuus, ille meus;

Que te suscipiet morientem terra, sepulcrum

      Post uite metam conferet illa michi."

25

Ruth sanctam notat ecclesiam de gentibus ortam,

      Que primo coluit idola plena dolo;

Nunc colit et recolit sacra uera, Deumque fatetur

      Hunc solum sancti quem coluere patres;

Que peruenturam se sperat quo caro Christi

30

      Conscendit postquam pertulit ille crucem.

Ruth Noemi sequitur cum gens conuersa priores

      Moribus et meritis est imitata patres.

Intrat cum Noemi Ruth terram plebis Hebree

      Cum noua ceperunt ordea falce meti;

35

Hec petit arua Booz, spicas ibi carpit, eundo

      Obsequiis gratam se facit esse suis.

Est ibi dispositum propter sua facta quod illam

      Ex Abrahe genitus semine ducat homo,

Et qui dicatur in stirpe propinquior illi;

40

      Sed uir talis eam ducere posse negat.

Mox alii cedit, et se discalciat ipse

      Seque suo privat iure suoque loco.

Iste Booz "Dominus uobiscum" primus ad illos

      Dixit qui segetes falce secante metunt;

45

Laude fauente decem maiorum Ruth datur

      Namque secundus erat iste propinquus ei.

Hunc attende locum, tu qui legis ista; Iohannis

      Baptiste formam continet iste locus;

Nam uelut iste prior cognatus se negat illam

50

      Ducere, sed post hec iungitur illa Booz,

Sic et Precursor, quem plebs credebat Hebrea

      Christum, "Non Christus nominor" inquit eis;

"Est sponsus quem uos nescitis, et eius amicus

      Stat foris et gaudens credit et audit eum."

55

Hoc uerbo se Precursor discalciat: "Eius

      Corrigiam non sum soluere dignus" ait.

Hocque modo Christus se calciat, huius amictu

      Carnis dum tegitur ut sociemur ei.

Ergo Ruth ecclesiam, signatque Booz Crucifixum;

60

      Iungitur illa Booz, iungitur ista Deo.

Maiorumque decem benedicit sermo duobus

      Vt det eis fructum qui dare cuncta potest:

Hoc notat illa decem benedictio, quod benedici

      Gens saluanda Iesu nomine semper habet.

65

Nomen terne Iesu: iota littera prima uocatur,

      Demonstratque lesum significatque decem.

Vita per hoc nomen datur omnibus, et benedici

      Absque Iesu solo nomine nemo potest.

Ille Booz de Ruth generauit Obed, pater iste

70

      Efficitur Iesse, fit pater ille Dauid.