Recapitulationes utriusque testamenti

 

Prima distinctio sine A

Principio rerum post quinque dies homo primus

      Conditus in sexto creditur esse die:

Exprimit hic Christum, qui sexto tempore mundum

      Ingrediens fit homo nos redimendo cruce.

5

Fit coniux ex osse uiri dum sompnus in illum

      Mittitur, et Christi mors fuit ille sopor:

Ecclesie signum fuit hec; de uulnere Christi

      Terreni generis sumpsit origo fidem.

Per ligni uetiti gustum nos ille peremit;

10

      In cruce nos redimit iste cruore suo.

 

Sine B

Ense Cain fratris transfodit uiscera; sanguis

      Fusus de terra clamat in aure Dei:

Iudeus Christum perfodit cuspide, cuius

      Sanguis sic clamat quod mala nostra lauat.

15

Prauos in terra fundatos exprimit Henoch,

      Menia de cuius nomine facta legis.

Seth, cuius nomen surrectio dicitur, illum

      Monstrat qui surgens de cruce summa tenet.

Enos, qui nomen Domini prius inuocat, illos

20

      Insinuat qui spe gaudia summa petunt.

Quem redimit post septenas decies genituras

      Et septem Christus, mundus imago Lamech.

Septimus a primo patre translatus fuit Enoch;

      Quos recipit requies septima signat eos.

 

Sine C

25

Ne pereat mundus, lignum Noe rexit in undis:

      Per lignum, per aquas nos, pie Christe, lauas.

Sem signat quosdam iustos aliosque prophetas,

      De quo profluxit illa propago patrum.

Gentilis populi qui nouerat inter Hebreos

30

      Viuere porro Iaphet esse figura potest.

Frater qui patrem derisit signat Hebreos,

      Qui rident Christi probra fidemque negant.

Is quem uir iustus pro patre suo maledixit

      Iudeos signat, quos modo mundus habet,

35

Quos patres egere reos in sanguine Christi

      His uerbis: "Proles post mala nostra luat."

Nemroth, qui turrim fundauit ad astra minantem,

      Est Sathanas querens alta sed ima tenens.

Mansio signat Heber, ubi prima loquela remansit,

40

      Edem, Christe, tuam qua manet una fides.

Rex dominusque Salem panem uinumque litauit,

      In quo signatur Christus utrumque petens.

 

Sine D

Eterni Patris typus est Abraham pater: are

      Ille suum natum consecrat, iste suum;

45

Nil Isaac patitur, aries fit uictima: Christi

      Nil patitur numen cum moriatur homo.

Ismael ac Isaac sacra testamenta figurant:

      Exprimit ille uetus, exprimit iste nouum.

Hirsutus rufus Esau notat exprimit illos

50

      Qui tinxere manus sanguine, Christe, tuo.

Fratri prelatus Iacob gentes notat; istas

      Prefuit Hebreis qui cor opusque notat.

Est Laban Sathanas, cuius nomen sonat album,

      Nam tegitur falso sepe colore Sathan.

55

Parca Rachel manet in partu set uentris auari

      Iacturam pensat largus in ore nitor;

Proles nobilitat uterum Lie set egenas

      Et steriles habuit et sine flore genas.

Pulcra Rachel sterilis mens est intenta supernis,

60

      Fraterno parcens utilis esse lucro;

Lia uiget partu quia lucra per utile uerbi

      Semen in ecclesiis actio sancta parit.

 

Sine E

Dum uir cum Iacob luctatur missus ab illo

      Claudus, in instanti fit patriarcha loco:

65

Sic dum luctatur Christum synagoga, fatigans

      Claudicat ac titubat huic mala multa parans.

Loth sanctos signat, quos mundi finis ab illis

      Diuidit ac saluat quos mala fiamma uorat.

Vxor Loth notat hos quos primum gratia Christi

70

      Traxit, post faciunt ad mala prima uiam.

Hanc patriam qua nunc Samaria fungitur una

      Filia Loth signat, ultima nata Sion:

Doctrinis contra Dominum maculatur iniquis

      Illius aut huius incola turba loti.

 

Sine F

75

Est Ruben primogenitus, populum notat illum

      Quem prius elegit gratia summa Dei:

Iste cubile patris uiolat dum quam sibi Christus

      Coniunxit carnem cogit finire crucem.

Scribe, quos Simeon notat, occidere prophetas,

80

      Postque prophetarum membra perempta Iesum,

Quem manus illorum clauis terebrauit acutis,

      Qui murus noster et petra nostra manet.

Auctores sceleris in Christi morte, leuitas

      Presbyterosque notat insinuatque Leui.

85

Iudas designat Christum, quem laudat in altis

      Angelus, in terris pronus adorat homo.

Bina luce solet catulus dormire leonis

      Postque duos surgit euigilatque dies:

Sic et tertia lux de sompno suscitat illum

90

      Qui stirpis Iude dicitur esse leo.

Est asinus ualidus Ysachar, recubans prope metas,

      Quod bona sit requies optima terra uidens;

Doctoremque notat qui robustos gerit actus,

      Ad ueram requiem lumina mentis habens,

95

Que uite meta, quis mundi terminus extet

      Commemorans et in his mente cubare studens.

Ecclesiam signat Zabulon, que luctibus huius

      Atteritur uite supplicioque patet.

Dan iudex, coluber in largo calle, cerastes

100

      In stricto ueniens stabit iniquus equo;

Ex hoc ascendens antichristus trahet ortum,

      Vt scriptura sequens inde loquendo sonat:

Hic erit ut coluber mordens tanquamque cerastes

      Illis qui rectis gressibus ire uolent.

105

Est equus hic mundus, est sessor quisque superbus,

      Mundi terminus est ungula talis equi.

Ille quidem ueniens in mundi turbine perdet

      Quos poterit, mordens deiciensque retro.

Bella Gad accinctus hunc precedendo mouebit,

110

      Accinctus ueniens stabit et ipse retro:

Discipulos notat hic ad Christi bella paratos,

      Quos preit et sequitur gratia larga Dei.

Pinguis panis Aser, pinguedine panis abundet;

      Eius delicias regibus ille dabit:

115

Altaris sanctus cibus illo pane notatur

      Qui reges, populos, ecclesiamque cibat.

Neptalim emissus dicatur ceruus, ad omnem

      Cursum succinctus, uerba decoris habens:

A Domino missos celeres portare per orbem

120

      Splendida uerba Dei denotat ille uiros.

 

Sine G

Ioseph uenditus est et Christus uenditus; ille

      Preficitur populis, omnibus iste preest.

Beniamin ante lupus rapiens predam sibi mane

      Diripuit, sero diuidit inde cibos.

125

Ad typicum sensum uenio: Saulum notat ille

      Ex cuius natus creditur esse tribu;

Iste prius rapuit predam sibi more lupino

      Dum furit in sanctos persequiturque pios;

Post factus Paulus iam desinit esse superbus,

130

      In populum Domini dum pia uerba serit.

Manasses populus prior est Effremque secundus

      Quem precedenti pretulit ecce Deus.

Est Thamar ecclesia, que sanctos concipit actus

      Dum tanquam baculo nititur illa truci.

135

Filo coccineo cuius manus hesit Hebreos

      Monstrat pollutos, Christe, cruore tuo;

Nos uero frater alius monstrare uidetur;

      Ecclesie matris nutrit utrosque sinus.

Dina coacta coit cum terre principe, stultam

140

      Insinuans animam quam mala uana trahunt.

Iob patiens Christum passum notat, eius amici

      Schismaticos quorum corda superba tument;

Filius iste Sare de Bassa, rex Idumee,

      Quartus successor post Esau nituit;

145

Sed de stirpe Nachor, qui frater dicitur Abre,

      Creditur hic natus sicut Hebreus ait;

Hoc in principio libri quem scripserat ipse

      Indicat: In terra Hus nomine Iob uir erat.

 

Sine H

Egypti princeps muliebrem uiuere sexum

150

      Imperat et mergi cogit in amne mares.

Demon femineos et molles diligit actus

      Ac sanctos odit persequiturque uiros.

Vitalem Moyses tunc temporis exit ad ortum,

      Per quem Iudeis lex fuit orta Dei.

155

Quem fiscella neci furatur scirpea, ripe

      Fluminis expositus, flens puer auget aquas;

Aure bibit pueri uagitum filia regis,

      Tolli iussit, ali fecit, amauit eum:

Ista sacram notat ecclesiam, que credula Christum

160

      Ad fontem lauacri cernit adesse sacri.

In ripa lacrimans Moyses Christum lacrimantem

      Denotat; in cunis fleuit uterque puer.

Aaron, qui populos emundat sanguine, Christum

      Signat, qui lauit sanguine cuncta suo.

165

Quam tetigit lepra, Moysi soror est synagoga

      Que lepram patitur, credere dura Deo.

 

Sine I

Bella mouens Amalech, tanquam truce fractus, ad arma

      Languet, Hebreorum patre leuante manus.

Hoc sua tela modo marcent dum preualet, alto

170

      Monte manens, clamans corde uel ore precans.

Pretemptans oculos nostro sermone uocatus,

      Rector Amorreus fertur obesse Seon;

Nosce per hunc Sathanam, cum se transformet ut extet

      Angelus et fallat qua ualet arte bonos;

175

Ogque Basan rector, quem conclusum uocat auctor

      Vel concludentem, denotat ecce Sathan,

Nam conclusus abest celo, concludere querens

      Est presens mundo nos lacerando modo.

Porro senes denos septem sanctus replet ardor,

180

      Totque loquele sunt que sacra uerba docent;

Per quas credentes ardescunt Pneumate Sacro,

      Tot sunt sermones quos modo mundus habet.

 

Sine K

In ligno botrus est pendens, in cruce Christus;

      Profluit hinc uinum, profluit inde salus.

185

Sunt duo uectores botri - gentilis, Hebreus -

      Hic prior, ille sequens; cecus hic, ille uidens.

Qui prior est dorsum curuans cecatur Hebreus,

      Ne uideat Christum, credere durus ei;

Sed plebs que sequitur gentilis lumine recto

190

      Heret in hunc, Christum mente fideque tenens.

Sabbata contempnens homo ligna legens notat illos

      Qui mala multiplicant et sine pace manent.

Vti thuribulis Abiron, Dathan, et Core temptant

      Contra iussa Dei, scismaticosque notant;

195

Sed sicut tellus tales absorbuit offas,

      Sic et scismaticos puniet ira Dei,

Qui faciunt altare recens, qui scismata querunt,

      Qui baptisma nouant ecclesiamque premunt.

Conductus Balaam fuit ut maledicat Hebreis,

200

      Sed maledicta magi sunt benedicta magis.

Insidet hinc asine, mutum loquitur pecus; ensem

      Non uidet angelicum sessor, asella uidet.

Muta prius plebs gentilis loquitur modo laudes,

      Christe, tuas; istud signat asella loquens.

205

Eius sessor erat aliquis qui falsa docebat

      Sacra coli donec respuit illa deos,

Donec Christus adest, qui consilii fuit alti

      Angelus et gentes subiugat ille sibi.

Cum Zambri scortum Phinees ferit et notat illum

210

      Qui uerbi gladio pessima queque secat.

 

Sine L

Est Iosue Christi typus: hic diuisit Hebreis

      Terre regna, Patris regna dat iste suis.

Binos iste uiros Iericho transmittit ad urbem

      Per quos agnoscat gentis et urbis opus.

215

Est Iericho mundus; duo testamenta Redemptor

      Misit ad hunc, hominum facta per ista probans.

Funis coccineus pendens herensque fenestre

      Seruat ab hoste Raab resque genusque suum:

Nos seruat fusus roseus cruor in truce Christi;

220

      Cuspide costa patens ista fenestra fuit.

Peccat Achor rapiens aurum, petra uindicat auri

      Peccatum, dampnat aurea furta Deus:

Scismaticos notat hic, qui miscent aurea scriptis

      Verba sacris; istos puniet ira Dei.

225

Sena tribus procerum quam ditat sanguinis ortus

      Monte stetit Garizim ut benedicat ibi;

Infima sena tribus que non ita sanguine uernat

      Monte stetit opposito, uerba seuera mouens:

Hi quibus incumbit benedictio corda figurant

230

      Que faciunt summe pacis amore bonum;

Hi quibus incumbit inuectio corda figurant

      Intuitu pene que uitiosa cauent.

Axa notat mentem que carnis conterit estus

      Et motus asine sub ratione premit.

235

A patre donantur Axe duo munera: nobis

      A Patre qui regnat munus utrumque datur;

Cum caro ieiunat, datur arida terra petenti;

      Cum gena rore madet, humida terra datur.

 

Sine M

Post Iosue de Iudicibus narratio fiat,

240

      A quibus adiuta fulsit Hebrea tribus:

Sic post te, pie rex, pie dux, pie Christe, periti

      Lectores ueniunt nostraque bella gerunt.

Si sacra uana colens populus peccaret Hebreus,

      Illos tradebat hostibus ira Dei;

245

Si prece pulsaret celos sacra uana relinquens,

      Hostes terga dabant illud agente Deo:

Sic te iussa Dei spernente tuus uiget hostis;

      Si pulses precibus ethera, uictor eris.

Peccat Hebreus adhuc, rex Eglon preualet illi;

250

      Pressus et afflictus supplicat ille Deo;

Plangit, suspirat, igitur respirat; in illo

      Sperat qui flenti gratus adesse parat.

Pugnis dexter Aoth pugnat, cruri datur ensis

      Dextro; rex Eglon corruit, ille redit.

255

Signat Aoth iustos, qui nulla parte sinistri

      Vt sint a dextris singula dextra gerunt.

Sexcentos Sangar instiua percutit hostes,

      Doctoresque notat qui sacra uerba serunt.

Vellus rore fluit prius, aruit area: uellus

260

      Iudeos, gentes arida terra notat;

Legis nube Deus prius irrorauit Hebreos,

      Sed fuit a tanto gens aliena bono.

Vellere siccato post hec fluit area: spretis

      Iudeis genti gratia larga fluit.

265

Concha repletur aquis expresso uellere: concha

      Virginis inpletur sancta liquore sacro.

Delbora siue Iahel proba, que ligno caput hostis

      Perforat, ecclesie queque figura fuit;

Inde sacro ligni signo - quasi Sisara - Sathan

270

      Vincitur orbatus iuris honore sui.

Hinc sequitur Iepte, pro cuius laude trophei

      Vnica nata fuit hostia facta Deo:

Claret in hoc Christus, caro cuius in cruce pendens

      Hostia pro nostra facta salute fuit.

275

Faucibus exultat asini Sanson, cruce Christus:

      Sternitur hinc hostis, uincitur inde Sathan.

Fons nouus e dente salit et prodest sitienti:

      Nos lauat et renouat crux sacra fonte sacro.

 

Sine N

Dux fortis Gazam petit ut societur amice:

280

      Ducat ut ecclesiam Tartara Christus adit.

Fraude ducem sepit hostilis turba: sepulcro

      Christi custodes prebet Hebrea cohors.

Hostibus ille grauis stellarum tempore surgit:

      Iste sub aurora leta trophea refert.

285

Hic urbis portas, predam tulit ille beatam;

      Preualet ille suis hostibus, iste suis.

Ardua rupis adit uictor dux hoste subacto:

      Victor Hebreorum Christus ad astra redit.

Quod caput illius spoliauit amica capillo

290

      Sacro, quod diris hostibus ille datur,

Quod uisum perdit, quod ludit, quod molit, istud

      Discute, tu lector, qui sacra uerba legis:

Est ratio quasi uir fragilis; caro dedita dulci

      Luxurie dici Dalida iure potest.

295

Illa comam radit dum te caro lubrica fallit;

      Est coma rasa Dei gratia rapta tibi.

Ista de causa te deludit tuus hostis

      Qui ruit e celo, qui mala queque fouet;

Sic oculos perdis quia puluere te uitiorum

300

      Cecat ut amittas corde uidere Deum;

Teque facit torquere molam dum circuit orbem

      Corque tuum miserum per mala multa rotat.

 

Sine O

Ecclesiam Ruth designat de gentibus; eius

      Vir Christus caste qui sibi iunxit eam.

305

Anna prius sterilis sic et designat eandem

      Ecclesiam plenam fructibus ecce piis.

Spretus Heli, nascens Samuel marcescere legem

      Designant ueterem, lege sequente data.

Ad gentes legis transire decus, gladiati

310

      Patris Heli iuuenes archaque capta petunt.

Nititur arte Saul rex ut pueri cithariste

      Guttas sanguineas regia tela bibant:

Sic et Iudeus in Christum perfidus eius

      Esuriit, sitiit uulnera, uincla, crucem.

315

Iure Dauid uerum Dauid expressit quia Christum

      Edidit ex eius stirpe Beata Parens.

Bethsabee nuda regi placuit quia legem

      Christus amat, cuius lucida uerba nitent.

Rex illa privat Vriam, Christus Hebreum

320

      Lege sua; dampnum nescit uterque suum.

Quam gerit Vrias Vriam littera perdit:

      Que gerit Hebreus per sua scripta perit.

Getheum Dauid extinxit, Christusque superbum

      Qui dicebat: "Erit pes super astra meus."

 

Sine P

325

Trans hominem Salomon sensu cum rebus abundans

      Fulsit et affluxit, istud et istud habens.

Dignam laude domum, cuius certare decori

      Non audent alie, dedicat ille Deo:

Ecclesiam multo quam Christus honore beauit

330

      Construxit ex iustis sidereisque uiris.

Regis in ede sacra non est audita securis:

      Nullus in etherea sede tumultus erit.

Naturas hominum, cantus auium, medicinas

      Herbarum, stellas etheris, alta maris,

335

Vim uenti, uires gemmarum, fulminis iram,

      Et rerum latebras est sibi scire datum.

Fit thronus ex ebore, Salomon ebur induit auro,

      Non meruit similem mundus habere thronum:

Rex Salomon Iesus est, maiestas Numinis aurum,

340

      Virginitas ebur est, Virgo Maria thronus.

Sub Roboam, sub Ieroboam diuisio regni

      In duo facta fuit istud agente Deo:

Designat Roboam, Solomonis filius, illos

      Nascenti Domino qui tribuere fidem;

345

Ieroboam seruus illos ostendit Hebreos

      Quos in fine necat filius ille necis.

 

Sine Q

Igneus Heliam rapit ad sublimia currus:

      Non ope, non curru fertur ad astra Deus.

Hospes inops mulier Heliam pascit et ille

350

      Pascit eam; maris hec pascitur, ille minus.

Non huic defecit oleum farrisue medulla,

      Nec minui poterat ille uel ille cibus.

Ecclesiam signat mulier, Christumque propheta:

      Hunc cibat et reficit moribus illa bonis.

355

Est Christi corpus et crismatis unctio uictus;

      Hinc cibat ecclesiam gratia larga Dei.

Iste cibus semper expenditur, iste redundat

      Semper nec minui siue perire potest;

Sumptus in altari panis manet integer; illum

360

      Semper sumis, eum sumere semper habes.

"Ascendat caluus," pueri clamant Heliseo,

      Sed necat ursus eos, deuorat ursus eos.

Iure notat caluus Christum: Caluaria nempe

      Dicitur esse loci pars ubi Christus obit.

365

Vrsi sunt illi duo, Titus, Vespasianus;

      Ierusalem ciues hic secat, ille necat;

Clamantes "Crucifige Iesum, crucifige" necantur,

      Et patrum culpas tota propago luit.

Dans famulo baculum tardas, Helisee; ministro

370

      Nil agitur, surgit te ueniente puer:

Non hominem saluat premisse littera legis;

      Cepimus aduentu uiuere, Christe, tuo.

 

Sine R

Totus fit Naaman mundatus dum subit undam:

      Nos penitus mundat quos aqua sancta lauat.

375

Peccans Ozias Iudeam denotat; eius

      Fetet pollutum labe fluente caput:

Sic et Iudeos Dominumque fidemque negantes

      Polluit impietas et mala fama necat.

Hic Ezechias, cui Iudex addidit annos,

380

      Signat eos quibus est danda beata quies.

Iosias pascha sanctum facit, idola tollit:

      Pascha Iesus faciens idola queque fugat.

Fit Sedechias cecus, delatus ad hostes:

      Subiectus Sathane lumine mentis eget.

385

Sanctus Isaias pandit loca mystica tanquam

      Sint euangelium que sua lingua sonat.

Castus homo natus Anathoth patiendo, loquendo

      Te signauit in hac laude, benigne Iesu:

Nos tua lingua, Iesu, docuit; nos passio lauit;

390

      Vtilis ecclesiis illa uel illa fuit.

 

Sine S

Qui mala corripuit Ezechiel notat illum

      Qui mundi rector omnia recta docet.

Dum populo loquitur, labor et dolor opprimit illum:

      Dum docet hic plebem, fert patiturque crucem.

395

Electrum nitidum bineque uidentur ab illo

      Virge; que latet hic mira figura fuit.

Fulget in electro nitor argenti, rubor auri:

      Emicat in Domino cum Deitate caro.

Argentum carnem, Deitatem denotat aurum;

400

      Carne Dei Verbum copulat illa duo.

Virga prior Virgo, crux altera uirga uocatur;

      Illa decore placet, illa uigore ualet.

Vita datur mundo Vitam pariente Puella;

      Vipereum frangit crux benedicta caput.

405

Floruit et uiguit pudor in Daniele, per illum

      Et uigor exprimitur innuiturque pudor:

Efficitur Daniel qui floret carne pudica,

      Quem non ad uitium ceca libido trahit;

Qui carnem macerat, qui rerum culmen abhorret,

410

      Lubrica contempnit, cum Daniele uiget.

 

Sine T

Cum mecham ducis, Osee, signas crucifixum.

      Ecclesiam mecham pronuba mecha uiro.

O prior ecclesia, prius idola uana colendo

      Mecha quidem fueras corde dolosa Deo,

415

Sed conuersa modo fis regis amica superni,

      Numina falsa cauens, carmina uera canens;

Nunc Domino laudes celebras, sponso canis hymnos,

      Glorificans illum moribus, ore, fide;

Pro sponso ludis modo psalmis, uocibus, hymnis,

420

      Cum quo gaudebis ac sine fine canes.

 

Sine V

Porro Ioel sonat incipiens, hominemque petentem

      Prima sacramenti dona notare potest.

Pastorem plebis in Amos pastore notabis;

      E gregi, plebi proficit iste Dei.

425

Abdias, pascens centenos pane prophetas,

      Altos doctores pontificesque notat,

Nam tales debent celestis nectare panis

      Pascere credentes ecclesieque fidem.

Tales commendat celestis gratia; tardos

430

      Lacte cibant, solido fortia corda cibo.

 

Sine X

Tam sermone Ionas quam naufragio notat illum

      Qui Patris est Sermo, naufraga corda docens.

Mittitur hic, missus metuit, metuens fugit, intrat

      Vas fugiens, sompnum uase receptus init;

435

Vnda tumet, missa sors hunc facit in mare mergi,

      Pisce uoratur homo, supplicat ille Deo;

Pisci precipitur ut quam tenet euomat offam;

      Auctoris uerbo paruit ille sui;

Tertia quando dies primum iubar euomit orbi,

440

      Euomit in terram belua iussa Ionam.

A Domino seruus, et Filius a Patre missus

      Dicitur; hic Domino paruit, ille Patri.

Puppe Ionas dormit, moritur Iesus in cruce; serui

      Ille sopor Domini mors preciosa fuit.

445

Puppis ligna crucem, tumulum Domini gula ceti

      Signat; in hoc per tres dormiit ille dies.

Tertia facta dies uomuit de uentre prophetam:

      De tumulo Dominum suscitat ista dies.

 

Sine Y

Cernit mente locum, pronuntiat ore Micheas

450

      Quo paritura Deum regia Mater erat.

Nomine teste Naum consolator notat illos

      Qui nos confortant et bona uerba sonant.

Fortis luctator Abacuc, qui cornua uidit

      In manibus Domini, quisque fidelis homo

455

Qui Domino credit, qui saluatum truce mundum

      Predicat et toto spargit in orbe fidem.

Illos insinuat Sophonias speculator

      Qui Martham spernunt, esse Maria uolunt.

Precipit Aggeus Domini domus ut renouetur,

460

      Vt iuuenescat opus quod senuisse uidet.

Vnus septenis lapis est ornatus ocellis

      Quem Zacharias mente stupente uidet;

Hic est Iustitie Sol, quem septena repleuit

      Gratia, cui penitus omnia nuda patent.

465

Nuntiat angelicus Malachias dona piorum,

      Penas prauorum iudiciique diem;

Ille figurat eum qui dicitur Angelus Alti

      Consilii, qui fons est et origo boni.

Nathan, Achiam, Sadoch, Azariam, Zachariam,

470

      Thobi, tres pueros, magnificumque Iesum,

Esdram, Zorobabel, Hester, Iudith, Machabeos,

      Non sine Susanna, que fuit equa uiro,

Cum supradictis quos carminis ordine pinxi,

      Continet hos omnes lex uetus illa uiros.

 

Explicit de patribus antiquis. Incipit de nouis

 

Sine Z

475

Isti sunt in lege noua: Baptista Iohannes

      Cum patre, cum matre, Virgo Maria parens;

Petrus et Andreas, Paulus, Iacobusque Iohannes

      Custos uirgineus qui sine labe fuit,

Thomas, Matheus, Philippus, Bartholomeus,

480

      Iacobus et Iudas, non malus immo bonus,

Mathias, Marcus, Lucas, Simon, Timotheus,

      Barnabas et Titus, hi docuere fidem.