1

Felix Gallia, fortibus trophaeis,

Vbertate soli, virum nitore,

Regni nomine purpurata magno

Romanae soror urbis atque consors.

2

Haec, inquam, melius dicata Christi

Signis, illita martyrum cruore,

Excellentius has togas frequentat,

Quas non impius inquietat hostis.

3

Thesauros Rhodani quidem fluento

Vallatos colit Alpibus sub ipsis,

Sed non sola tenet decus sacratum,

Quod toto liquet eminere mundo.

4

Magni Mauritium loquor rigoris,

Cum quo Candidus Exsuperiusque,

Armorum comitis fidem secuti,

Iuverunt ducis optimi calorem.

5

Thebaeae legio beata gentis,

His concredita lege militari,

Veri militiam secuta regis

Vexillo crucis impetivit hostem.

6

Nullas sontibus intulere caedes,

Quin ipsi gladiis deo immolati,

Quam terris Orientis imbiberunt

Castris occiduis fidem recludunt.

7

Auget crimina saevus imperator,

Quem nec carmine nominare dignum,

Dum sanctos iubet idolis litare

Nolentesque necem subire mandat.

8

Dux primus sotios simul coactos

Hortatur stabilem tenere mentem:

"Nullus deficiat timore, nemo

Perturbetur", ait, "deum sequamur.

9

Armis iam satis hactenus caducis

Hostes stravimus aemulante dextra,

Nunc virtute animi domandus hostis

Maior, maior enim corona restat.

10

Nec dilata diu fatigat ergo

Merces stemmatis, ecce laurearum

Pugnantes hodie trophaea vosmet,

Si vincatis, apud deum manebunt".

11

Perstant intrepidi, loquuntur ore

Vno: "Praecipe, Caesar, expeditos

Pro tutamine publicisque rebus

Depugnare viros, oboediemus.

12

At si forte deo cupis relicto

Nos servire tuis, profane, divis,

Te contemnimus et severitatis

Temptamenta tuae minasque viles.

13

Iam nunc rumpe moras, abi satelles,

Haec conamina nuntia tyranno,

Exurat, perimat licet necetque

Limpha fluminis, aut secet lapillis".

14

Stant inflexibiles, manentque fixi,

Non dant liba diis genuve ponunt,

Rex et conditor est quibus per aevum

Christus, vivere commorique lucrum.

15

Haec postquam ferus impiusque lictor

Crudeli domino relata perfert,

Commotum scelus ardet in cruentis

Statim pectoribus magisque fotum.

16

"Hanc", inquit, "gravibus notam querelis

Mecum vix tulerim, quod ordo nostri

Tales officii remandat ausus,

Exemplum dabo iam per hos futuris.

17

Miles perge, neca viros protervos,

Et primo decimum recide quemque:

Sic saltim mea iussa pertimescent".

His actis calor invenitur idem.

18

Instaurat reus integratque caedem,

In totumque movet gregem machaeram,

Certat se pia praevenire turba,

Serum quisque sibi putat, quod instat.

19

Caeduntur gladiis, replentur ipsae

Valles corporibus, fluuntque rivi

Sacri sanguinis, ipse per cruorem

Sanctorum Rhodanus sacratus exit.

20

Hinc iam nobilior, suoque maior

Excursu, mare cum decore magnum

Maiori petit, omne Galliarum

Regnum de nece martyrum coronans.

21

O quam nobilis unda, quae beatas

Solvens exequias, lavare plagas

Et secum meruit sacrata ferre

Et se corpora possidere circa.

22

Quae pridem leve nomen indicabant

Felicis loca iam placent Agauni,

Angustos aditus refulget inter

Quod miratur amans quadratus orbis.

23

Postquam carnifices scelus peractum

Clauserunt, epulis dedere sese,

Inter funera pro dolore luctus

Ausi laetitiam sequi iocosam.

24

Ad convivia mente saniori

Pervenit stupidis senex medullis:

"Victor cur geris", inquiens, "maligna

Miles gaudia, stragis in cruore"?

25

"Iussit providus imperator", aiunt,

"Omnem militiam deos colendo

Complacare sibi, quod haec rebellis

Nolens turba luit furore poenas".

26

Suspirans senior, "Quid", inquit, "istam

Aetatis seriem miser peregi?

Quam vellem, optio si daretur, inter

Hos finire pios gravem senectam".

27

Dicentem rapiunt, senem trucidant,

Fit martyr sotiusque candidati

Coetus, et quibus ante concupivit

Iungi, protinus additur maniplis.

28

O summis pia laudibus colenda

Sanctorum legio, cruore lota,

Quam perfectior omnibus figuris,

Hoc senarius ordinat decore.

29

Nam sex milia sexiesque centum,

Seni tum decies semelque seni,

Dicuntur numero fuisse pleno;

Nil sanctos melius potest decere.

30

Tanto munere gaudeamus omnes

Qui caeli super astra nos patronos

Tot confidimus inclitos habere,

Quorum oratio quod petit meretur.

31

His si servitium fidele cures,

O Chonrade, pater mihi colende,

Totis viribus exhibere, iugis

Te per grandia facta pax sequetur.

32

Nam quamvis miser atque criminosus

Sim, credo tamen hoc labore parvo

Sanctorum meritis diu petitam

Strabonem veniam a deo mereri.

33

Sanctae gloria magna trinitati

Sit per saecula cuncta, laus, potestas,

Virtus una, salus perennis, ipsa

Semper nos prece martyrum coronet.