Si quod mille sonat relationum

Assertoribus estque veritatis

Vbertate ratum tacere nitar,

Fortasse invidiae notam subibo.

5

Non hoc ergo meae placere menti

Contingat, potius velim benigne

Audire et sine fraude publicare.

Quicquid nam bene de bonis refertur,

De vestra fateor probitate, tantus

10

Nosmet rumor alit rapitque mentes,

Vt si dissimulem favere laudi,

Contra, quod gero, conscientiam sit.

Miramur conscientiae decorem,

Quo vos praecipue nitere notum est,

15

Miramur meritum, probosque mores,

Quis vos non dubium est placere cunctis.

Qui vos laudat, honore se coronat,

Qui vos laudat, amat colitque verum,

Qui vos laudat, habebitur benignus,

20

Qui vos laudat, agit quod est agendum.

Non isthaec adulantis ore promo,

Nec desidero complacere falsis,

Sed veris potius viam loquendi

Verbis institui parare rectam.

25

Nam si comperero licere nobis,

Et si cunctipotens hoc annuendo

Clementer dederit, legetis exin

Nostri pectoris indices figuras.

Nunc et semper et hic et in futuro

30

Salvete in domino, valete, avete.

Vos sanctus pater et patris beata

Proles, spiritus et iuvet per aevum.