De numero librorum utriusque Testamenti

Clauditur iste liber in quadraginta libellis.

      Dat triginta duos lex vetus. Octo nova.

Sunt ita dispositi mira brevitate libelli,

      Praescripti numeri monstrat ut ordo tibi.

5

Ore styloque Dei digestus et editus orbi

      Canon Scripturae creditur esse sacrae.

Qui tamen excipit hos: Tobi, Iudith, et Machabaeus,

      Et Baruch, atque Iesum, pseudographumque librum.

Sed licet excepti, tamen hos authenticat usus

10

      Ecclesiae, fidei regula, scripta Patrum.

Scito quod ista Dei digito digesta fuerunt.

      Altus hic est puteus, grandis abyssus inest.

Omnia non caperes si saecula multa videres,

      Et studio vigilans, et ratione vigens.

15

Spiritus ista docet doctor, qui conditor idem,

      Quique scienda dedit, hic quoque scire facit.

Scire facit, si mente studes, si sedulus instas.

      Cum prece dans studium, cum studioque precem

Sic studuere patres, ut pagina sacra pateret.

20

      Sic reserant sancti clausa sigilla libri.

Simplex multiplicem cortex hic continet escam.

      Littera ceu cortex. Sensus ut esca triplex

Historicum, typicum, moralem discute sensum.

      Si cupis hoc typico te satiare cibo.

25

Cum legis historiae textum, bibitur quasi dulcor

      Lacteus, aut potius simplicis haustus aquae.

Nec multum iuvat hic. Cum quis tamen appetit, eius

      Spiritus exemplis ut recreetur agit.

In typico sensu vini sentitur acumen.

30

      Potus inebriat hic, exhilaratque magis.

Qui bibit hoc vinum scripturae, saltibus altis

      Venatur, reperit, consequiturque Iesum.

Moralem vero cum dat tibi lectio sensum,

      Tunc quasi mellitum sugis in ore favum.

35

Hae sunt deliciae, quibus intus pascitur, et fit.

      Dives mens hominis moribus inde bonis.

Horum tu quodcunque feras ut praemia iustis

      Vel quae sunt, discis, flagra ferenda malis.

Proximus inde Deo propter condimen honoris,

40

      Inde timoratus et bene cautus eris.