1

Ecce votis apta vestris

Venit hora, psallite,

Gaudium cordis patescat

Claritate carminum:

Salve regum sancta proles,

Care Christo Carole.

2

Nullus ordo, nulla rerum

Nunc silescat vastitas,

Mens et lingua, cor, voluntas

Laudem dando personet.

Salve regum sancta proles,

Care Christo Carole.

3

Credimus superna votis

Angelorum milia

Nostris congaudere digne,

Vt dicamus cernui.

Salve regum sancta proles,

Care Christo Carole.

4

Anna vatem, Sarra risum

Non fudit libentius,

Quam te toto nunc tenellum

Corde mulcet Augia.

Salve regum sancta proles,

Care Christo Carole.

5

In te terra nostra patrem

Suscipit cum fratribus,

Cum quibus tibi decora

Pars honoris permanet.

Salve regum sancta proles,

Care Christo Carole.

6

Ferte nabla tibiasque,

Organum cum cymbalis,

Flatu quicquid, ore, pulsu

Arte constat musica.

Salve regum sancta proles,

Care Christo Carole.

7

Dicat omne plebis agmen,

Clerus ipse primitus,

Dives, pauper, sospes, aeger

Consonent in laudibus.

Salve regum sancta proles,

Care Christo Carole.

8

Te Maria sancta virgo

Cum subiectis omnibus

In salutem christianam

Protegat feliciter.

Salve regum sancta proles,

Care Christo Carole.

9

Turba quod simul piorum,

Qui deo sunt proximi,

Actitet penes supernam

Poscimus clementiam.

Salve regum sancta proles,

Care Christo Carole.

10

Gloriam dignam triformi

Pangimus potentiae,

Quae te sanum vexit istuc

Francorum per regmina.

Salve regum sancta proles,

Care Christo Carole.