Bis, quadringentos dum mundus volveret annos

      Ac bis quindenos octoque iure simul,

Ex quo salvator voluit de virgine nasci,

      Solveret ut mortis debita dura potens,

5

Cumque suum faceret indictio prima recursum

      Instabili currens nocte dieque gradu,

Compleretque annos viginti et quinque volutos

      Hludowicus regni sceptra regendo pie,

Implens Aldricus bis ternos optime soles,

10

      Ex quo suscepit pontificale decus;

Ternos ante dies quam Maius currere mundo

      Coepisset cursum perficiendo suum,

Redditur Aldrico, Carilephus corpore sanctus

      In quo iure iacet, rite monasterium,

15

Cum villis cunctis, cum rebus denique totis.

      Confirmans scriptis optime cuncta satis,

A sancto atque pio Hludowico Caesare summo.

      Disponens regnum dum resideret Aquis.

Hoc quoque praedictus legaliter induperator

20

      Egit consultu nobilium procerum.

Cui da, Christe potens requiem sine fine manentem

      Consortem faciens civibus angelicis.