Quantas incipiat grates edicere, Galle,

      Se negat hoc nosse fistula nostra, tibi

Munere pro tanto mihi collato sine nostro

      Ostenso nusquam obsequio tibimet.

5

Vnum se tantum iactat hoc cordis in antro

      Condere, si nobis vita aderit socia,

Donec econtra valeat certare: quod aptum

      Sit munus tali reddere munifici.

Interea virtus te salvet protegat atque

10

      Christi per saecli plurima curricula

Centuplicata illi placeat tibi reddere dona

      Hic et in aeternum gaudia perpetua.

Multa tibi habui mente depingere nostra,

      Aspexit faciem sed lupus ante meam:

15

Idcirco sensum subitoque dirempsit et ipsum

      Vna cum voce: tu quoque, Galle, vale.

Ad finem nimias dicit tibi nostra salutes

      Fistula, quas supra conticuit capite.

Mos manet in scriptis erga vitare priores

20

      Has a subiectis, nomina ceu propria.

Blandiloquas ideo minime fuit ausa salutes

      Offerre in prima fronte salutifera.