Cernitis, o famuli gratis dulcedine pasti

      Pastoris Christi Richarii eximii,

Virtutes dominus quas digne operatur in aula,

      Ipsius membra quo recubant nivea,

5

Tanti pro meritis patroni iure colendi,

      Vivorum placida qui regione micat

Pacifero famulans regi, qui regnat in ipsa

      Zonatim septus milibus astricolis.

Odas idcirco reboet vox vestra canendo

10

      Aeterno regi magnificas, famuli,

Ac simul egregio patrono reddite laudes,

      Signa deus per quem plura salutis agit.

Nec etiam pigri maneatis pectoris antro

      Huius enim gesta figere melliflua.

15

Quodsi quis nostrum fuerit compunctus amore

      Divino, cupiens hocque notare sciat:

Antiquus perstet codex ne sic breviatus,

      Ceu mansit nostra hactenus incuria;

Quo partim miracula picta videntur honeste

20

      A quodam Albino nomine doctiloquo. -

Nunc, fratres, ad vos sermonem verto parumper,

      In paucis iterum versiculisque loquor.

Cernite, qualis sit, caelo qui tanta operatur,

      In terris deinde vosque cavete bene,

25

Quo pariter vigiles maneatis nocte dieque

      Eius in obsequio: hoc breviter moneo,

Quatinus effugere domino miserante queatis

      Danorumque mala, vivere pacifice.

Nam precibusque suis dominus conservet ovile

30

      Nostrum per saecli plurima curricula.

Post mare transmissum mereatur cernere portum

      Tranquillum, celsus quo residet dominus

Felicem reddens naulum felicibus ipse

      Exhibito nautis forte labore sibi:

35

Felix ille satis, parvum qui ceperit unum

      Nummum inter Christi navigeros inibi. -

Sumite, doctiloqui, scriptum hoc, quod cernitis: aptum

      Si fuerit, legite, quaeque monet, facite;

Quod si non fuerit, minime ridere velitis

40

      Illud pro nimia rusticitate sui.

Et vos in Christo Iesu sine fine valere

      Ore precor patulo, corde meroque rogo.