O venerande pie frater mihi semper amande,

      D<un>gale, praeclaro nomine et ingenio:

<Vltima t>errarum genuit nos Scottica tellus,

      Sanguinis egregii glutine iunxit amor.

5

Illustris fueras multorum rite magister,

      Patria te tenuit dum tua, clarus eras;

Vrbibus in nostris radio flagrante superno

      Nobilis et sacri dogmatis auctor eras.

Vitae namque tuae cunctis moderamine iusto

10

      Exemplum dederas inscia corda docens.

Tu Laginensis honor, te plangunt Liphia rura?

      Defundunt lacrimas Mastena iuga suas,

Munera digna dabant Fosensis culmina collis,

      Lilia cum rosulis Currucha prata tibi,

15

Caulantes montes tibimet, cum piscibus amnes,

      Arboreus populus roscida mella fluit.

Nimpharumque chorus sparsis de more capillis

      Te quaerunt pariter motibus, ore, pede.

Boenna te plangit tristis formosa puella,

20

      Poplite virgineo currit adusque mare.

Slana simul Berve te plangunt crine soluto,

      Tothrea litoreas turbida tinxit aquas,

Si, Neptune, tuis non obstas fortiter undis,

      Virgineusque chorus trans mare tendit iter.

25

Nobilis et vallis vestra est ex iure parentum.

      Defluit ex gemino magna fluenta lacu.

Te memorando nimis doluit Comgenia nata,

      Corruit in faciem languida membra gerens

Discessumque tuum potuit nec ferre puella.

30

      Irruit in flammas, ignibus arsit iners,

Ornatusque suos gemmis fulgentibus auro

      Clausis marga -- suis candida - rita thoris,

Vestes purpureas lapides sectoque elifanto

      Pectoris ornatus, artificale decus,

35

Tecta repleta bonis pariter consumpserat ignis,

      Omnia vastabat flamma repente loca.

Disseruisse suos sponsumque relinquere fines

      Flet Petrus proprios, sponsa relicta perit.

Tu quoque sectando divine scemata legis

40

      Psalmi et, euangelium dogma et apostolicum,

Contemnis patriam, caros postponis amicos,

      Exul in urbe † velis regna superna petens.

Sed tamen ipse tuis Christus servavit honores

      Moribus, hos merito, Dungale, crede modo.

45

Verbis veridicis praedixit talia Christus

      Reddere pro parvis magna futura suis.

Hic tibi centena praesenti gaudia praestat.

      Semper in aetheriis vita beata manet.

Nam modo Lodvicus rex magni gloria secli

50

      Prospera cuncta tibi dat, dedit atque dabit.

Munera muneribus, millenos praedia servos"

      Villas magnificas, aurea dona, dapes,

Vestes mirificas diversicoloribus aptas,

      Texerat has docta pulchra Minerva manu,

55

Quas tibi eo de pio largitur regia coniux.

      Aurea his iunxit pocula larga ....