1

Spera caeli quater senis horis dum revolvitur,

Omnes stellae fixae caelo, quae cum ea ambiunt,

Circa axem breviores circulos efficiunt.

2

Illa igitur, quae polo apparet vicinior,

Inter omnes tamen ei splendor est precipuus,

Ipsa noctium horarum computatrix dicitur.

3

Argumentum en inventum: cardini oppositum

Recta linea si serves luminum intuitu,

Horas noctis nosse potes galli sine vocibus.

4

O quam pulchrum stemma tenet clavorum positio

Crucis Christi rotae fixae hoc in orologio,

In qua ipse carne pendens pro salute hominum!

5

Dextra, leva et profunda, quae tendit ad aethera,

Servat semper computatrix per distincta tempora

Aequinoctia designans atque solestitia.

6

Ante axem siquis volvens curiosus steterit,

Aequinoctium vernale a sinistra noverit,

Cernere ad dextram sui autumnale poterit.

7

Solistitia duobus indita temporibus:

Aestivalis, qui erectus ad superna ducitur,

Radius, ad ima mersus hiemalis dicitur.