1. versus cuiusdam Canonici de laude libri

Stringere pauca libet bona carminis huius et ipsum

      Laude uel exili magnificare librum.

Hic ea triticea est pannis allata farina

      Hebreo populo de Pharaonis humo.

5

Hic illud missum de celo manna saporum

      Omnem gustanti quod sapit ore cibum,

Omne quasi sapiens epulum quia continet omnem

      Viuendi formam consiliique modum.

Vt breuius currem per singula - preminet auro

10

      In pretio, soli luce, sapore fauo.

Qui facit humano generi quod sol facit orbi:

      Sol terre lucet, luce cor iste replet.

Fons est ortorum, puteus uel abyssus aquarum,

      Quarum potus alit pectora, corda rigat.

15

Pascua celestis, cellaria regia, celum,

      Tot signis fulgens quot sacramenta tegens.

Poma noua et uetera que sponso sponsa reseruat,

      Poma sub inculto cortice grata nimis.

Hic calamus scribe subito scribentis, hic arcus

20

      Qui curatiuo uulnere corda ferit.

Hic rota siue rote, quarum ut mare uisio mira,

      In medioque rote fertur inesse rota.

Quatuor his facies, species est una; leuantur,

      Stant, uel eunt, prout has spiritus intro regit.

25

Hic liber in dextra regnantis scriptus et intus

      Et foris, intus habens mistica, plana foris.

Quem comedens quasi mel fore scribit Ezechiel, in quo

      Lamenta et carmen uhe quoque scripta refert.

Hic Moysi facies, que uelo tecta uideri

30

      Non ualet at Christi luce retecta patet.

Per Moysen typico, per Christum sanguine uero

      Hic liber aspersus remque typicumque gerit.

Lex nona, res; antiqua, typus; diffusior illa;

      Hec breuior; retegit ista quod illa tegit.

35

Dumque rei testis typus extat, abyssus abyssum

      Inuocat, utraque lex nomen abyssus habet.

Sic breuitate libri gemine clauduntur abyssi,

      Vtraque magna nimis, nullus utramque capit.

Iugiter hec legere, meditari, inquirere, nosse

40

      Quid nisi celesti luce ciboque frui?

De utilitate legendi hunc librum

Nil homini melius quam si diuina legendo

      Figat ibi uitam quo sibi uita uenit.

Vita fidesque, quibus ad uite dona uenitur,

      Non nisi diuinis scitur inesse libris.

45

Libros ergo lege quibus insunt pascua uite,

      Congestos pariter quos capit iste liber.

Felix qui fecit hoc et eodem fonte saporem

      Attrahit ut uitam condiat inde suam;

Nam nisi sic sapiat, sapientem non puto quando

50

      Nil sibi quod didicit codice corde sapit.

Qui studet his uel propter opes uel propter honores,

      Non sapit, it prorsus a sapiente procul.

Spretor opum sapiens, opus eius cultus honesti,

      Pax animi fructus, gloria finis erit.

55

Non nisi propter se uult se sapientia queri.

      Qui colit hanc, audi que metat inde bona:

Purior affectus, sensus fit clarior, et mens

      Liberior, mundo carneque pressa minus.

Lectio iugis alit uirtutes, lucida reddit

60

      Intima, declinat noxia, uana fugat.