6. epistula Aegidii

Vtile cum dulci studio miscere sategi

      Quando hec inclusi mystica lege metri.

Ex se res quod ametur habet; modulatio prestat

      Vt magis e facili possit in aure bibi.

5

Nil eque cupio, quantum ut sit fructus in istis,

      Mentem lectoris edificasse mei.

Res ideo tractare sacras post illa reducor,

      Que quondam ex animo forte fuere leui;

Sicque decebat, nisi tot iam ante negotia lusi,

10

      Vt cuperem uel nunc ad meliora rapi.

Munus ab Aegidio missum tibi suscipe, queso,

      Magne pater, presul Parisiensis, Odo.

Sepe aliquo uolui uobis seruisse uideri

      Nec satis aduerti quomodo posset agi

15

Donec eo libro, qui Bibliotheca uocatur,

      Causa ad rem faciens et satis apta datur.

Vulnificabat eum defectio magna libellum,

      Cui neque que decuit ianua prima fuit.

Post faciens saltum, de paschali nichil agno

20

      Dixit, in hoc languens deficiensque loco:

Forsan materia est nimis ardua uisa canenti,

      Forsitan et fessus respuit auctor honus.

Quocirca, a sociis crebro multumque rogatus

      Istum defectum tollere uelle, tuli.

25

Insuper, in libris Thobie, Iudith, et Hester,

      Et Machabeorum mystica multa dedi;

Post toto ueteris suppleui corpore legis,

      Vt magis aduerti quicquid abesset ibi.

Et quia non renui, uisu est debere quod auxi

30

      Id plerique suis inseruere libris.

Deinde Euangelico quicquid quasi fessus omisit,

      Maxima supplendi cura laborque fuit;

Totque fuere quod hec perscribere uix ego gessi

      Spem si temptarem posse nocere michi.

35

Postea collegi per singula que capit idem

      Textus et expositor promptus ubique fui.

En ea perscripsi uobisque in munera misi

      Sicut dilecto precipuoque patri,

Non quia non esset modulus faciendus ad aures

40

      Tanti pontificis arduiore chely.

Verum materie pro maiestate putentur

      Sicut que deceant et satis apta dari.

Sunt nonnulla quibus ueniam peto non bene missis,

      Sed fuit id fieri lege necesse metri.

45

Esse etiam clemens optatur ad omnia lector,

      Nam neque inest elegis forma uenusta nimis;

Nec cito prosiliant nosci in commune, sed ante

      Privati incipiant et sine teste legi;

Immo sub examen ueniant prius, inde fauorem

50

      Sub tytulo nostro si meruere ferant.

Tunc tandem dicant esse hec supplemina nostra,

      Et tu, lector, ubi sic decet esse nota;

Nam quia sum libri consutor factus, ubique

      Versiculis nostris pretytulatur acus.