1.

Quadam nocte niger Dub nomine, Candidus alter

      Forte subintrarunt unica tecta simul.

Candidus exhibuit secum ter quinque nitentes

      Totque niger nigros more colore pares.

5

"Candide, de nostris primus quis", dixerat alter.

      "Praevidet excubias? Nam tua dicta sequar"

Haec placido contra respondit Candidus ore.

      "Iudicio quemquam nolo gravare meo,

Ne nova lis socios per me conspiret in arma:

10

      Sed tibi consilium non removebo meum.

Ordine disponam socios discumbere cunctos,

      Quos sors nona legat noctis in excubias.

Candida sed sedeat nigris commixta caterva,

      Vt me velle viros fallere nemo putet".