Praesulis eximii laudes ornare camenis

Opto piis, fuerit mihimet si copia fandi,

Nempe meus calamus sua iam magnalia pangit.

Tu decus ecclesiae, tu flos et gloria plebis,

5

In te dona dei rutilant virtute superna.

Famine divini verbi semper, bone presul,

Illustras pariterque foves sub pontificatu

Commissum populum et revocans ad dona salutis,

Invigilas proprio ceu prudens pastor ovili.

10

En opus, alme pater, en nostrum suscipe carmen,

Rector ovans sacrae ecclesiae, ne tempseris illud,

Laude pia dignus digneris propitiato

Vultu respicere exiguum censendo libellum,

Ipse tuo iussu domino quem dante notavi;

15

Nam vigeat si rite tuo munimine carmen,

Omnes insidias spernet moderamine tanto.