Cum iuvenis splendens fueram, mutuatus adibam

Coenobium sanctum celso Nabore sacratum,

In quo preclari multa et virtute probati

Insignesque viri desudant laude perhenni;

5

In quo pax radiat magna et sapientia regnat,

Moribus et sanctis concordia fulget in illis.

Illuc cum veni, felicem me reputavi;

Nam capite et cauda portavi tergora nuda,

Vndique nudus eram; sed mox vestitus abibam.

10

Non te sicut me decoratum credo, Lucane,

Nec te Constantinus habens vestivit honore

Vt me Cuonradus, qui sit semper benedictus;

Cuius sic studiis signis fulgesco novellis,

Margine deque meo nunc plura problemata pango.

15

Quae quicumque legis, dic: "Vivant semper in altis

Sancto Nabori famulantes sorte perhenni!"

O quicumque libens versus aspexeris istos

Vndique et adpositos, utiles et iure legendos,

Dic: "ΚΟΥΩΝΡΑΔΩ sit vita salusque misello".