Iussor amande tuis, pie rex Heinrice, subactis,

Gemma nitens regni, totius flos microcosmi,

Dante deo rutilans, fastigia summa gubernans,

Ad cuius nutum stat nostrum vivere tutum,

5

Suscipe perscriptum te praecipiente libellum,

Plenum legiferis patrum fratrumque statutis,

Quem tibi non tardus, mihi tardior, abba Gerhardus

Nomine, non meritis, Sewensis et altor ovilis

Exiguus tribuo magno pro munere voto

10

Vt stillam roris stagnis miscendo marinis.

Pabunpergensis donanda cacumina sedis,

Cuius constructor, fautor numeraris et auctor,

Quae quasi praesago per longa moramina signo

Tempus adusque tuum protraxit nominis ortum;

15

Nunc quia sceptrigeras moderante potenter habenas

Te, pater, aecclesiae matris mons pollet opime,

Regia iura serens, summo sub praesule degens

Virtutum studiis semper sudante beatis

Cleris ac populis expendit pabula legis.

20

Haec Iebusaicae partem capit inclita doxae,

Aucta salutiferi pretioso sanguine Christi,

Condit et aureolis crucis almae fragmina thecis.

Arcem Romanam se gestit habere coaequam,

Archilegato dans prima cubilia Petro

25

Plaudit et agiae loca ferre secunda Mariae,

In medio magnum gaudet sustollere Iesum,

Estque domus dominus martyr Georgius almus

Vndique congestis solidis numero sine sanctis,

Quorum praesidio clarebit honoribus aevo,

30

In fundamentis redimitur nunc quia tantis,

Matribus ut priscis sit filia maior opellis

Ornatus cuncti, quibus utitur area mundi.

Non minus ista Sepher Cariath cluit arte scienter,

Inferior Stoicis nequaquam, maior Athenis,

35

In cuius laribus gladium dat diva duabus

Mater natabus, quo findant nexile corpus

Particulas per sex; quibus extat tertia iudex

Partibus adiectis, et sic crescentibus offis

Quadruvio mensas trivium proponit amicas,

40

Quis mulcet pueros, famosos nutrit ephebos

Pascit et almarum pastores aecclesiarum

Illustres vivi spargentes semina verbi,

In quibus ut firmis cernuntur stare columnis.

Hic onus argenti collucet montibus auri,

45

Adduntur variis radiantia serica gemmis.

Haec inopum fotrix ut magnorum dominatrix,

Haec caput est orbis, hic gloria conditur omnis,

Pro nihilo meret, dum te sude vincta cohaeret,

Principe te crescit semper semperque virescit,

50

Floret, maturat venturaque saecula durat.

Quid loquor ingenii balbosus somniculosi,

Non Maro cum lepidus nec dicax posset Homerus

Texere multiplices laudabilis urbis honores,

Horum si vita potuisset surgere tanta.