1

Cuncta creans, Dee, verbigena,

Sother et unica lux, patria,

Flamen et alme salusque via,

Trine, perennis et une tua

Sancte cluens ditione sacra.

2

Dum boat hec veneranda sacris

Plebs tua laudibus himnidicis,

Almus Eparchius angelicis,

Quod micat arduus ipse choris,

Lucicomis rutilans atriis.

3

Debita iure precum famuli

Solvimus en olochausta tibi,

Quaeque tui capiant oculi,

Rebus et eripe nosque mali

Ob meritum patris almifici.

4

Hic equidem genitus tumido

Germine, prosapia nitido,

Principe cive Petragorico,

Praedia, marmora cum thalamo

Terrea tempsit amore tuo.

5

At quia pauper egens et inops

Hic gazeos renuit loculos,

Te faciente, Deus, niveos

Rex pie, nunc habet ipse toros,

Topazios quoque caesareos.

6

Quaesumus, huius amore sacro

Patris Eparchii dulcisono,

Qui Domino canimus modulo,

Nos famuli, tribuente Deo,

Salvificemur ut omni modo.

7

De solio patris artificis

Munera sumere sic animis

Caelica cum paradisicolis

Commoda corporibusque suis

Quod rogitet sacer hic meritis.

8

Christus ab axe Deus supero,

Cum patre paraclitoque sacro,

Nostra perornet amore suo

Corda, cui sit honor Domino,

Hic et in omnia perpetuo.