1

Nunc incipiendum est mihi magnum gaudium.

Sanctiorem nullum quam sanctum umquam Gallum

Misit filium Hibernia, recepit patrem Suevia.

Exultemus omnes, laudemus Christum pariles

Sanctos advocantem et glorificantem!

2

Cursu pergunt recto cum agmine collecto,

Tria tranant maria, celeumant "Christo gloria"

Columbanus, Gallus, Magnoaldus et Theodorus,

Chiliano socio, post functo sacerdotio,

Gallos pervagantur, Francis immorantur.

3

Renovant Luxovium in Christi caulas ovium,

Passi meche varias Brunhildis et insidias

Tristes spernunt Franciam contendunt et in Sueviam.

Castro de Turegum adnavigant Tucconium.

Docent fidem gentem, Iovem linquunt ardentem.

4

Tucconio ingrato hinc excomunicato,

Vadunt in directum, examen ut collectum

Querunt alvearia, temptantes loca varia:

Arbonam per lacum advolitant Potamicum;

Colligit Willimarus illos Christo carus.

5

Pergit hinc Brigantium grex gentes baptizantium.

Columbanus amplum hic Christo sacrat templum.

Docet parvum clerum cantare deum verum.

Latrones et duos occidunt fratres suos.

Fugit mox Italiam, terram procul aliam.

6

Gallus infirmatur, ab via retardatur.

Cui mandat motus, quod restet, Columbanus,

Missas numquam celebret, se vivum quoad sciret.

Repetit febricitans Arbonam, Christum supplicans

Egros allevantem, faciat se valentem.

7

Presbiter Christo carus dat lectum Willimarus.

Convalescens Gallus deserti fit mox avidus.

Dux fit Hiltibaldus, occurrit locus commodus.

Clamant damna demones, retentant Gallum vepres,

Diaconus accurrit, lapsans illum distulit.

8

Gallus forte psalmum in ore tenet almum:

"Requies hec est mea per seculorum secula!

Semper hic habitabo, deum meum invocabo.

Hiltibalt percare, iam noli me vetare,

Libet sic iacere, noli sublevare!"

9

Instat tandem triduo vir domini ieiunio;

Consecrando locum litabat vota precum.

Fit ambobus ardor, procumbit omnis arbor,

Regnat vis flammarum condensa per silvarum.

Infert ursus truncos igni passim advectos.

10

Panem Gallus bestie mirande dat modestie.

Mox ut hunc voravit, in fugam festinavit

Iussa silvis cedere, hic nullum posthac ledere.

Diacon iacebat soporans et videbat,

Qua virtute Gallus pollet dei famulus.

11

Hinc de loco demones abegit et serpentes.

Ducis sanat filiam, quam Satan vexat rabidam.

Exit ore torvus colore tamquam corvus.

Offert Gallo dona pro mente virgo sana,

Que dispersit sanctus dedit et pauperibus.

12

Optant illum populus pontificem et clerus.

Quis sacrandum proprium Iohannem dat discipulum.

Hinc superno numine in montis stans cacumine,

Spiritum abbatis locandum cum beatis

E conspectu terre angelos videt ferre.

13

Votum mox inhibitum post patris litat obitum.

Gaudet pisce magno Petrose capto stagno.

Trabem breviorem dat prece longiorem.

Pergit hinc ad castrum ob Michahelis festum.

Egit missas more, spiritus tonat ab ore.

14

Egrotat in castro electus deo nostro.

Post fletum, post gemitum defungens efflat spiritum.

Michahel fidelis locavit hunc in celis.

Accurrit episcopus flens ad magistri corpus.

Caligas eius induit claudus et exiliit.

15

Corpus est nudatum, ut solet, ob lavatum,

Renes et sacratos mirantur vulneratos.

Capsam clausam pandunt catenam et offendunt

Cruore perfusum horrebant et cylicium;

Clamant: o felicem suimet carnificem!

16

Equis hinc indomitis gravatum corpus martyris

Presul imponebat infrenes et laxabat.

Currunt in directum ad celle patris tectum.

Sequitur cum clero Iohannes atque populo.

Kyrieleison clamant et defletum tumulant.

17

Iohannes, noli flere, magistrum crede vivere.

Vivit, inquam, Gallus, beatior iam nullus.

Vivit per miracula, dans scutum ad obstacula.

Iudex inter dextros sessurus in sinistros

In tremendo examine. Gloria tibi, domine!