1

Deus amet puellam

Claram et benivolam,

Deus amet puellam.

2

Quae sit mente nobilis

Ac amico fidelis,

Deus amet puellam.

3

Constans gemmis similis

Atque claris metallis,

Deus amet puellam.

4

Candidior nivis

Dulcior est et favis.

Deus amet puellam.

5

Cedunt illi rosae

Simul atque liliae,

Deus amet puellam.

6

Cedunt flores, cuncti

Amant illam sancti.

Deus amet puellam.

7

Pollet nempe terris

Luna velut in caelis.

Deus amet puellam.

8

Solis quippae radios

Vincit illa fervidos.

Deus amet puellam.

9

Vnde rogo, puella,

Velis scire talia.

Deus amet puellam.

10

Quae fit illi dignitas,

Cui manet caritas?

Deus amet puellam.

11

Quae fit illi gloria,

Quae non extat perfida?

Deus amet puellam.

12

Stringe tuum animum,

Iunge tuum amicum,

Deus amet puellam.

13

Qui tibi noctu dulcia

Dare poscit oscula,

Deus amet puellam,

14

Molles et amplexus

Veros et affectus.

Deus amet puellam.

15

Vale, vale, puella

Omnium dulcissima,

Deus amet puellam.

16

Vale iam per evum,

Christus sit et tecum.

Deus amet puellam.

17

Omnes dicant Amen,

Qui in caelo poscunt requiem.

Deus amet puellam.