In Sancti Mauri abbatis metrum sapphicum endecasillabum

Quid tuo nobis potius placere

In die debet, tibi quam decoris

Fortius niti precibus vel hymnis,

Optime Maure?

5

Tu sacris quondam puer institutis

Maximum vitae studium perennis,

Vnde praeclaris rutilas triumphis,

Hic didicisti.

Es memor quantae fidei fuisti,

10

Cum tuos mollis tulit unda gressus,

Excito cursu Placidum profundo

Fonte levasti.

Illud est inter tua signa valde

Dulcius nobis, quod et hac in arce

15

Languido gressum simul et loquelam

Restituisti.

Hic viam longe positus videbas

Palliis stratam, facibus coruscam,

Qua pater caelum Benedictus olim

20

Noster adivit.

Quod tibi quondam fieri petebas,

Lege, sub qua nos modo, regulari

Gnaviter vivens, prece da perenne

Vivere nobis.

25

Ipse fundator placidae quietis

Huius, hoc tecum faciat rogamus,

Nam quod optamus, bene si velitis,

Ferre potestis.

Velle det vobis pietatis auctor,

30

Rex Deus, cum quo sine fine regnat

Filius compar, sed et utriusque

Spiritus almus.