De Sancto Nicolao

 

Rex regum, Deus, omnium

Sanctorum decus et gloria, qui duces

Sacrae militiae novis

Semper muneribus perspicuos facis,

5

Ornas et diademate

Regni perpetuo, quo pariter frui

Tecum vis sine tempore,

Ante principii constitit ut diem,

Adsunt unde celebria

10

Horum festa piis laudibus annua,

Cum mundus tua praemia

Per dimensa sui climata praedicat,

Te poscentibus annue

Vti dulcisonis cantibus hac die,

15

Sertis quando micantibus

Nicolaus adit sidera fulgidus.

In quarta puer hic semel

Et sexta feria suxerat ubera,

Quod mirabile prandium

20

Contractum minime te sine creditur.

Transactis puerilibus

Annis, ecclesiae limina saepius

Observans, patrimonii

Heredem fieri te voluit sui.

25

Auro non modico viri

Sedat pauperiem, qua patitur miser

Stupro germine nobiles

Tres a se genitas tradere virgines.

Hoc Myraea metropolis

30

Digne promeruit praesule perfrui,

Quem divina fidelibus

Vox audita suis signat episcopum.

Compulsus precibus, maris

Compressit citius grande periculum,

35

Et ponto prope subrutos

Tranquillo penitus restituit loco.

Nautis nil minuit datum

Angusto famis in tempore triticum,

Sed per iuge biennium

40

Cunctis hoc fuerat copia civibus.

Hostis fraudibus obvians

Versuti, pelago vas oleum ferens

Effundi iubet ocius,

Quod combussit aquae materiam diu.

45

Post poena capitis reos

Tres a morte viros eripit impiger,

Cuius namque potentiae

Et clausae bifores sponte sua patent.

In somnis modo Caesarem

50

Eparchumque modo territat acriter,

Et valde positus procul

Pellit parta trium funera principum.

Nicolae, salutifer

Et tutor famulis esto perenniter

55

Cunctis, te celebrantibus

Hoc festo placidis cum tibi laudibus.

Te mirabiliter colit,

Laudat, magnificat Graecia nobilis;

Immo totius orbis haec

60

Gaudet meta tibi munera solvere.

Mundi Roma caput suis

Aequalem celebrat semper apostolis,

Cuius crebra iuvamina

Non multis precibus quaerit et impetrat.

65

Quis non duceret hunc diem

Festum plus reliquis, cum genitoribus

Natos reddis, ab hostibus

Raptos ad varii servitii iugum?

Ponti multiplices sinus

70

Observans, facili cum prece posceris;

Tempestatibus horridis

Summersis miseros navibus eripis.

Nil est quod nequeas dare

Exorantibus; hos respice servulos,

75

Hic da tendere prospere

Et fer post obitum sidereas opes.

Cum scriptore, tuum satis

Romanum, petimus, presbyterum iuva,

Votis atque laboribus

80

Respondens solito munere plenius.