In sanctorum martyrum Fortunati Gaii et Anthes

Sanctis martyribus laus, honor et decus,

Qui caeli Domino sanguine proprio

Sacrati, superae militiae vicem

Invicta retinent fide.

5

Conflictus validos ferre viriliter,

Hostiles cuneos frangere fortiter

Certavere sui corporis obice,

Vt post funera viverent.

In regis positi nunc diademate,

10

Stellarum potius lumine praenitent;

Donativa suis militibus dedit

Christus Filius haec Dei.

Ex quorum numero sunt quibus optime

Gaudet plebs hodie cantica promere

15

Laudis nostra piae, tanta velut decet

Huius lumina patriae.

Fortunate, tuis utere prosperis

Rebus cum meritis cui nota nominis

Concordat pariter, nosque tua prece

20

Da gaudere perenniter.

Et tu, Gaie, bonis moribus annue

Nobis assidue corda retundere,

Et quod nunc petimus, sumere postea

Nos feliciter adiuva.

25

Anthes, perpetuo lumine splendide

His et par merito iure nec ultime,

Communem Dominum fac totiens roges

Pro nobis, quotiens potes.

Hoc nobis Deitas, rex, tua conferat

30

Discordem numeris congeriem ligans,

Vt secum stabili pace per omnia

Vivamus tibi saecula. Amen.