Ad Attonem episcopum Teatinum

Multa promittis, tibi quae nocere

Rite debebunt; neque te solutus

Proteget risus, nec honor iuvabit

Praesulis, Atto.

5

Sacra mendacem canonum statuta

Praesulem damnant, vetat atque vulgus

Legis in contractibus approbando

Dicere quicquam.

De tuo lectas grege sponte vaccas

10

Sex mihi, mirabile forte munus

Tunc inauditum quod erat, Casino

Teste, dedisti.

Namque sex harum, velut intimaras,

Prima cum Nino Babylonis altos

15

Condidit muros, cataclysmus illam

Sensit in arca.

Omnium linguis avium secunda

Te loqui plane docuit, beatus

Si tuis scires modo sic Latina

20

Reddere verba.

Artium septem studiis et omni

Paene doctrina fuerat perita,

Teque Timaeum socio Platonis

Tertia scripsit.

25

Quarta qua felix recrearis, auram

Semper a cauda tibi sufflat aptam,

Nec suis, caelum, nisi te levarit

Cornibus, ibis.

Semivestitum genuit cuculla

30

Quinta causarum comitem tuarum

Pontium, cum quo sine fine mendax

Totus haberis.

Febribus te sexta tuetur atris

Floribus lectis, speciebus, herbis

35

His tuo fiet stomacho salubris

Potio, tucca.

Si potes, noli mihi, praesul Atto.

Vltro mentiri; cole sic amicum,

Vt decet, fidum; tibi mox nec ulla

40

Causa nocebit.