Ad Gisulfum principem Salernitanum

Vrbana potius nobilitate

Pro certo nihil est, sola quod actus

Munitos probat, et cuncta refellit

Quae prodit levitas, maxime princeps.

5

Quicquid nempe probi possidet orbis,

Hoc totum probitas fecerat Vrbis,

Quam servare domi militiaeque

Decrevit stabili iure senatus.

Tu virtute animi, corporis et vi

10

Augustos sequeris, nulla Catonis

Te vincat gravitas, solus haberis

Ex mundi dominis rite superstes.

Quis iam frondifera tempora lauro

Miles te religat dignius usquam?

15

Si Carthaginis hic victor adesset

Consul, sponte tibi cederet ipse.

Tarpeiae solitae cernere rupes

Victrices aquilas, protinus omni

Pulsa maestitia, Caesaris acta

20

Gaudent, praeside te, posse novari.

Gallos namque duces, colla ligatos

Antiquo gravibus more catenis,

Nec vidisse iuvat, ni videant nunc

Hos a te reprimi Marte recenti.

25

Paulos et Fabios Corneliosque,

Gracchos, Fabricios Roma, Lucullos,

Te viso, memorat, hisque decenti

Quem virtute parem monstrat et armis.

Haec mucrone tuo frangere Pyrrhi

30

Iam festinat opes Hannibalisque

Fortunas veteres atque furores,

Vt stringat solitis legibus orbem.