Incipit oda in honorem Innocentum

Candentem segetis novae

Miremur cumulum, choros

Qui fauces teneras agant

Coram principe canticis.

5

Gaudet primipilos recens

Ductor mittere praevios.

Laetatur paribus Puer,

Florum primitias legens.

Hic gaudet titulis loqui,

10

Quos prorsus dabat inscios

Aetas et sine crimine.

Sic dignis canitur prior,

Insons innocuum tonat.

Si linguae officio carent,

15

Clamat sanguineus rubor.

Occisi resonant decus,

Quod vivi nequeunt loqui.

Quid vis, tigride durior?

Quid saevis, canibus canis

20

Peior? quid furiis vacas?

Pignus caelicolum putas

Infandis manibus premi?

Sed frustra tumeat furor,

Et te magnificum Puer,

25

Materna ubera subbibens,

Vincat, te fugiens domet.