1a

Omnis sonus cantilene trifarium fit.

Nam aut fidium concentu sonus constant

Pulsu plectri manusve,

Vt sunt discrepantie vocum variis

Chordarum generibus;

1b

Aut tibiarum canorus redditur flatus,

Fistularum ut sunt discrimina, queque

Folle ventris orisque

Tumidi flatu perstrepentia pulchre

Montem mulcisonant;

2a

Aut multimodis gutture canoro idem sonus redditur

Plurimarum faucium, hominum volucrum animantiumque,

Sicque in pulsu guttureque agitur.

2b

His modis canamus carorum sotiorumque actus,

Quorum <in> honorem pretitulatur prohemium hocce pulchre

Lantfridi Cobbonisque pernobili stemmate.

3

Quamvis amicitiarum

Genera plura legantur,

Non sunt adeo preclara

Vt istorum sodalium,

Qui communes extiterunt

In tantum, ut neuter horum

Suapte quid possideret

<Nec> gazarum nec servorum

Nec alicuius suppellectilis;

Alter horum quicquid vellet,

Ab altero ratum foret;

More ambo coequales,

In nullo umquam dissides,

Quasi duo unus essent,

In omnibus similes.

4

Porro prior orsus Cobbo

Dixit fratri sotio:

"Diu mihi hic regale

Incumbit servitium,

Quod fratres affinesque

Visendo non adeam,

Immemor meorum.

Ideo ultra mare revertar,

Vnde huc adveni;

Illorum affectui

Veniendo ad illos

Ibi satisfaciam".

5

"Tedet me", Lantfridus inquit,

"Vite proprie tam dire,

Vt absque te solus hic degam.

Nam arripiens coniugem

Tecum pergam exul, tecum,

Vt tu diu factus mecum

Vicem rependens amori".

Sicque pergentes litora maris

Applicarunt pariter.

Tum infit Cobbo sodali:

"Hortor, frater, maneas:

Redeam visendo <te>

En vita comite;

Vnum memoriale

Frater fratri facias:

6

Vxorem, quam tibi solam

Vendicasti propriam,

Mihi dedas, ut licenter

Fruar eius amplexu".

Nihil hesitando manum

Manui eius tribuens hilare:

"Fruere ut libet, frater, ea,

Ne dicatur, quod semotim

Nisus sim quid possidere."

Classe tunc apparata

Ducit secum in equor.

7

Stans Lantfridus super litus

Cantibus chordarum ait:

"Cobbo frater, fidem tene,

Hactenus ut feceras,

Nam indecens est affectum

Sequendo voti honorem perdere;

Dedecus frater fratri ne fiat."

Sicque diu canendo

Post illum intuitus,

Longius eum non cernens

Fregit rupe timpanum.

8

At Cobbo collisum

Fratrem non ferens

Mos vertendo mulcet:

"En habes, perdulcis amor,

Quod dedisti, intactum

Ante amoris experimentum.

Iam non est, quod experiatur ultra;

Ceptum iter relinquam."