Stephane sancte papa, mea carmina suscipe laetus,

      Annue iam votis, Stephane sancte papa.

Magna trophaea iubes sanctorum promere scriptis;

      Vt cunctis pateant magna trophaea, iubes.

5

Plurima congeries hos presserat actenus arvi,

      Occultans illos, plurima congeries.

Quos studio proprio fossos ad sydera tollis,

      Ac condis digne, quos studio proprio.

Versibus illa tibi, prosa quin porrigo, domne,

10

      Quae didici, pandens versibus illa tibi.

Vocibus angelicis resonet polus omnis et ether,

      Concordent populi vocibus angelicis.

Auribus altithroni caelestes cantica dicunt,

      Et nos cantemus auribus altithroni.

15

Quis tibi, rex, similis, verbo qui cuncta creasti?

      Tu formas homines; quis tibi, rex, similis?

Sanguine martyrii lotos diademate vestis,

      Abluis et iustos sanguine martyrii.

Numerianus enim, regni quum sceptra teneret,

20

      Chrysantum punit, Numerianus enim.

Virgineumque decus furiata mente trucidans

      Insequitur Dariam, virgineumque decus.

Mergere iussit eos lapidum iactuque retundi

      Et vivos humo mergere iussit eos.

25

Spiritus alta petit caelesti sede locandus,

      Merguntur menbra, spiritus alta petit.

Nuntiat adveniens sevissima facta cruento,

      Et speleo fossos nuntiat adveniens.

Sed deus omnipotens portentis omnia lustrans,

30

      Se dignos mostrat, sed deus omnipotens.

Diodorus properans, nimia comitante caterva,

      Presbyter ad funus Diodorus properat;

Marinianus enim levitae functus honore

      Cum multis sequitur, Marinianus enim.

35

Vndique conveniunt populi celebrare triumphos,

      Et venerare pios undique conveniunt.

Gloria, Christe, tibi! tua dum suffragia poscunt,

      Ad te pertingunt. Gloria, Christe, tibi!

Munera dum tribuunt venerantes corpora sancta

40

      Orando populi, munera dum tribuunt,

Indicat accelerans sanctorum facta tyranno

      Affore Christicolas, indicat accelerans.

Protinus ille furens praecepit claudere criptam,

      Obruit et montes protinus ille furens.

45

Clauditur innumerus populi conventus in antro;

      Thesaurus caeli clauditur innumerus.

Cantet "Osanna" deo Seraphym pariterque Cherubym,

      Et genus humanum cantet "Osanna" deo.

Dum veniam rogitant, conscendunt aethere laeti,

50

      Succurrunt cuncti, dum veniam rogitant.

Gloria sit domino patri sine fine perhenni,

      Ipsius et nato gloria sit domino;

Spiritus alme, tuum conlaudant sydera numen:

      Laudemus numen, spiritus alme, tuum.