Luminis fons, lux et origo lucis,

Tu pius nostris precibus faveto;

Luxque, peccati tenebris fugatis,

Nos petat alma.

5

Sancta vis cuius hominem creavit,

Iusque damnavit, pietas redemit:

Sis ut in cunctis pius atque iustus

Omnipotensque.

Excitat cur nos fidei potestas,

10

Erigit spei decus in futura:

Caritas iungit habitura finem

Tempore nullo.

Et pius vitae moderator huius,

Et labor tempus habeat quiesque:

15

Dumque succedunt sibimet vicissim,

Nos vegetemur.

Ecce transactus labor est diei,

Nosque te tuti sumus annuente;

En tibi grates agimus perennes

20

Tempus in omne.

Solis abscessus tenebras reduxit,

Ille sol nos inradiet coruscus,

Luce qui fulva fovet angelorum

Agmina sancta.

25

Caelitus lumen rutilum refunde,

Et fuga mentis tepidae tenebras:

Sinus accensi ut face spiritalis

Vascula lucis.

Quas dies culpas hodierna texit,

30

Christus deleto pius atque mitis:

Pectus et puro rutilet nitore

Tempore noctis.

Sit procul luxus, procul omnis horror,

Atque phantasma speciesque pulchra,

35

Mens sed insomnis valeat supernos

Cernere cives.

Te deum semper vigilans requirat,

Cogitet cunctis resoluta curis,

Actibus cunctis queat ut placere,

40

Rex, tibi, summe.

Muniat frontem, loca sive cordis

Sermo divinus, crucis et trophaeum

Daemonum vafros abigat meandros

Sive rapinas.

45

Membra, quae casto dabimus cubili,

Prompta consurgant opus ad diurnum,

Quae suum mundum velit esse templum

Spiritus almus.

Quod pius totum habitet per aevum,

50

Hunc nec offendat vitium luesque,

Sed vocet vitae probitas, fiatque

Mansio grata.

Sit via prudens, via fortis, arcta,

Iusta seu solers, bene temperata,

55

Huius ut cursus peragamus aevi

Tramite recto.

Sex dies iustos operemur actus,

Septimo captent animi quietem:

Sint in octavo rediviva nobis

60

Gaudia vitae.

Gloriae laudum pia plenitudo

Sit patri, nato, tibi, spiritusque

Sancte, qui trino vehis alma sceptra

Nomine solus.