Vita, salus, virtus, verbum, sapientia, sponsus,

Ianua, pastor, ovis, prolisque parentis imago,

Recta columna, lapis, turris es, lucifer et sol,

Gratia plena patris, augmentum lucis ab ortu,

5

Altitronus Iessus, lex optima, factor Olimpi,

Consilium, princeps, repletus fructus oliva,

Omnipotens vitis rector, en unctor et unctus,

Legifer aetherius, testis, dux, sermo, profeta,

Victor, ubique tremit te caeli regia, praesul

10

Maximus et minimus, signum venerabile cultu,

Botrus es in Cypro, mors, servus, victima, manna,

Arbiter aeternus, nimbus, quo terra virescat,

Lampas es aut panis superus commissus ab alto,

Exitus, introitus, sors, regnum sive redemtor

15

Orbis es, en, medicus ponens pigmenta salutis,

Signifer in clipeis tu vincis semper et arcu,

Emptor adeptus eras claro de stipite mundum,

Rex regum, dominus, cunctis lux alma per orbem,

Principium, finis, locuples et pauper amictu,

20

En puer et senior, fons, flumen, pastor et agnus,

Nomen habens oriens, vexillum lucis es ortum,

Simpliciter mitis, mirandus es ore profuso,

Fortis seu infirmus, tu plenis sensibus Aron,

Iustus es et iudex, tua solum sancta voluntas;

25

Regna beata tenens de stercore sumis egenos,

Murus es invalidis, puteus, quem femina potat,

Ignis in hunc orbem, missit quem verus ab arce

Supremusque parens, tritus tu passus es Abel,

Scriba es, tu cervus, caprea de cespite Bethel,

30

Inclyta porta bonis, plana et tu semita recta,

Morsus es inferni, o rex, cuius celsa tribunal

Astra poli superat, prior a consortibus es tu,

Pacificus Salomon verusque oblatus es Isac,

En homo tuque deus, pensas qui proemia cuique,

35

Tu stas damnans omne nefas, defensor et ultor

Rex pie, virtutum tibi gloria, mystice Samson,

Auxiliare decus, flos campi, summaque dextra.

His de nominibus, per quae scriptura vocare

Iesum saepe solet, haec pagina scripta patescit.

40

Nomina multa deo, dum discutienda leguntur,

Mystice conveniunt, ex quis haec ipsa notavi

Et scribenda tibi melius, rex Carle, putavi:

Tuque memento mei, dicor qui nomine Ioseph.