De Walchelino episcopo

Consilium, virtutis amor, facundia comis,

      Walcheline pater, fixa fuere tibi.

Corrector iuvenum senibusque documenta ministrans,

      Exemplo vitae, pastor utrosque regis.

5

Pes fueras claudis, caecis imitabile lumen,

      Portans invalidos, qui cecidere levans.

Divitiis dominus, hilaris largitor earum,

      Dum reficis multos, deficis ipse tibi.

Os tu plebis eras, regis secretior auris,

10

      Illum subiectis, se sibi concilians.

Mensis erat Iani, rapuit te tertia nonas

      Indiscreta trias, te super astra trahat.