A cunis mens una duos, amor unus utrumque

      Complicat et paribus nutus utrumque notat.

Pectoris interpres nutus denudat utrumque

      Pectus et obstructum vota refirmat iter.

5

Invidus uterque paries distinguit utrumque,

      Quo magis obstruitur et magis urit amor.

Dum vetitum cassatur iter, solatur utrumque

      Rima, quibus reduci limite verba refert.

Voces alternant alternaque vota retractant

10

      Et furantur eis mutua verba diem.

Verborum seriem nox claudit, supplet eclypsim

      Verborum vigili pectore cura vigil.

Sollicitos corrodit amor, nox, cura; triforme

      Vulnus: amor vehemens, nox pigra, cura vigil.

15

Solem preveniunt et verba remissa retentant,

      Mentis ut affectus mutua verba bibant.

Votum compescit paries, placet exitus urbis,

      Vt spacietur amor liberiore via.

Solis decursus resupinat in equora cursus

20

      Et festina petunt vota statuta peti.

Pre properam tysben trahit in loca pacta priorem,

      Eius ut impatiens pectus oberrat amor.

Munera custodes excecant, era perorant

      Egressum, voto cedit inunca manus.

25

Concludunt gressum loca pacta, moratur amator

      Et cunctatur eum desidiosus amor.

Dum sedet absque suo sibi displicet, exulat a se

      Querit mente suum nec redit absque suo.

Alter abest sed neuter adest, quia cum sit uterque

30

      Quod reliquum, neuter solus abesse potest.

Cum sit idem tysbe quod piramus, illa quod ille,

      Non habet hunc numerus, non habet ordo locum.

Ergo quid hic faciunt hec nomina: neuter et alter,

      Primus et extremus? fas sibi verba petunt.

35

Dum mora multat eam, vestigia luna leene

      Detegit et suadet terror inire fugam.

Indiscreta fuge rabies, velamina lapsa

      Non meminit pectus infatuante metu.

Fonte leene sitim correpta recolligit iras

40

      In vittam, rapidis unguibus hostis ei.

Vitte particulas cruor oblinit; hec tibi demum

      Funeris ingressum, pyrame, causa parit.

Cui quia causa recens mentitur fata puelle,

      Effluit in querulos lingua sonora sonos:

45

"Me miserum, periit mea! me miserum mora tanta!

      Que mihi? me miserum quid periturus agam?

Prima fere rabies, mora more erat altera tysbes

      Et sic ex gemina morte coacta mori.

Quid merui de morte queri? quid maius obire

50

      Quo fato duplici? cur? quia causa fui.

Quod scelus huic sceleri poterit conforme videri?

      Que purgare possit ulcio digna scelus?

Post tantam cladem vivam moriarve, quid ad rem?

      Spiritus inficiet tartara, corpus humum.

55

Causa fui leti, letum sequar; altera vite

      Pars fatum subiit, altera fata sitit

Ne perear par absque pari. par finis utrumque

      Claudit et unanimes obruit una dies."

Hactenus, et votis obnoxius annuit ensis.

60

      Nec mora: transmigrat spiritus, ossa ruunt.

Quid tysbe? latebris exit, sed semina luctus

      Invenit et sperans commoda, dampna videt.

Prebet ei meroris iter cruor, ensis, amicus:

      Rore cruor, plagis ensis et ille nece.

65

Mors invitat eam. quid agat? cupit anxia mortem

      Morte sequi. more est vivere, vita mori.

Vt sit principio par exitus, arripit ensem

      Et par transmigrat spiritus ense pari.

Testaturque necem morus mutata colorem

70

      Et nigra facta dolet morus uterque mori.