De ligurio

Vertitur in lapidem quod stillat ab inguine lyncis.

Ligurium vocitant, et salculus est pretiosus,

Nam credunt ipsas hoc persentiscere lynces,

Quae mox egestum certant operire liquorem,

5

Dum super accumulant congestae pondus arenae,

Scilicet invidia, ne nostros cedat in usus.

Electro similem Theophrastus habere colorem

Hunc ait, et simili paleas adducere pacto,

Aestimans ipsum stomachi placare dolorem,

10

Ictericis etiam priscum reparare colorem,

Et perturbati compescere reumata ventris.