De tribus donis magorum

Quid thus designet, quid obumbret myrrha, quid aurum

      Exprimat inquiro, pagina sacra docet.

Haec tria pondus habent sacris induta figuris;

      Haec tria plus pretii quam foris intus habent

5

Testa lapis cera est, quod verba foris tibi dicunt,

      Quid latet interius, nucleus, unda, favus.

Eliciet testa nucleum, lapis evomet undam,

      Cera favum premet, si bene cuncta notes.

Mortuus in myrrha Christus signatur, in auro

10

      Rex, in thure Deus, sunt tria forma trium.

Huic offers myrrham, credatur mortuus, aurum

      Regem credendo, thus venerando Deum.

Quid latet interius adhuc de verbis elice sensum,

      Rursum mellitus prodiet inde liquor.

15

Per myrrham macerata caro, doctrina per aurum,

      Per thus signatur vox lacrymosa precum.

Dat myrrham qui se macerat, thus questibus orans

      Cum lacrymis, aurum qui sapienter agit.