Quam periculosa mulierum familiaritas

Femina perfida, femina sordida, digna catenis.

Mens male conscia, mobilis, impia, plena venenis,

Vipera pessima, fossa novissima, mota lacuna;

Omnia suscipis, omnia decipis, omnibus una;

5

Horrida noctua, publica ianua, semita trita;

Igne rapacior, aspide saevior est tua vita.

Credere qui tibi vult, sibi sunt mala multa parata.

O miserabilis, insatiabilis, insatiata.

Desine scribere, desine mittere carmina blanda,

10

Carmina turpia, carmina mollia, vix memoranda,

Nec tibi mittere, nec tibi scribere disposui me;

Nec tua iam colo, nec tua iam volo, reddo tibi te.

Me mihi vivere, pace quiescere, sunt mea vota

Consului mihi, consule tu tibi, sis tua tota.

15

Quoslibet elige, collige, dilige, sint tibi mille;

Sit tibi charior, aut pretiosior ille vel ille.

Mens tua vitrea, plumbea, saxea, ferrea, nequam.

Fingere, fallere, prodere, perdere, rem putat aequam.

Summa potentia funditus omnia destruat ante

20

Quam mea sumere, quam mea tangere sustineant te.