De XII lapidibus et nominibus filiorum Israel

Ruben precedens in origine, iaspis in ede,

Virtutum simul et fidei primordia signat.

In partu Simeon, saphirus in ede secundus,

Triste cor insinuat, cui conversatio celum.

5

Tertius appositu calcedon, germine Levi,

Incrementa boni, sed adhuc occulta figurant.

In nascendo Iudas, et quartus in ede smaragdus,

Ora professa fidem, fideique loquuntur agones.

Appositi quinti Dan sardoniusque paratos

10

Iudicio memorant, humiles ac pectore puros.

Sardius appositu, Neptalim tempore sextus,

Martirium signant et amoris duplicis ignes.

Crisolitus templo, Gad patri septimus ortu,

Accinctos in bella notant signisque micantes.

15

Inde berillus, Aser octavos, uterque figurant

Iam requie mentis operumque nitore beatos.

Nonus structura topazios, Ysachar ortu,

Contemplativos et spe mercedis ovantes.

Hinc decimus Zabulon, crisopasusque recensent

20

In bello fortes pretiique virore refectos.

Vndecimus iactu iacinctus, origine Ioseph,

Votis addentes atque omnibus omnia factos.

Inde verecundos, humiles, longoque merentes

Martirio dextram Patris amplexusque figurat

25

Beniamin et pariter ametistus, uterque supremus.