Dumque meant glebas regionis, venit Atrebas,

Quo patuli campi spatio virgulta ferentis

Obdormire volens, desternitur ille iumento,

Vtitur et verbis orans vernantibus herbis

5

Vt modicum somni capiat, studio gerit omni.

Haec requies felix, quae provocat agmina caelis.

Tuncque viro fesso, somno per timpora presso

Visio monstratur; de qua mox ipse beatur.

Nuntius applaudit, quae presul letior audit:

10

"Aldenborg veniens, non multo tempore vivens,

Secula transibis, felicia regna subibis,

Quae careant fine, quae pollent perpete luce.

Te domus illatum Petri capiet tumulatum;

Tempora nec multa patieris carne sepulta,

15

Terra tolleris, meritorum laude frueris".

Vir Domini surgens sociosque viae satis urgens,

Sic famulis inquit: "Iam surgite! Sufficit istic

Nos ita dormisse vel somnia grata vidisse,

Somnia non falsa, quae pandunt premia celsa.

20

Iam bene celetis quae me referente scietis.

Vobis predico, quod triste manet inimico,

Me cito scansurum caelos civemque futurum

Angelicis turmis, precibus quod posco diurnis.

Hinc vos gaudete, letissima corda tenete

25

Et sic tractate Christum, sic rebus amate

Vt vos suscipiat, quando cinis haec caro fiat!"

Hoc simul ostendit, quod mens cognoscere tendit.

"In Petri templo tumulabor et ipse sepulchro.

Sed iam pergamus, patriam iam calle teramus!

30

Tempore completo, venient haec munere leto".

Hinc stupor atque dolor famulantum pectora scidit.