Carta, Christo comite, per telluris spatium

Ad Caesaris splendidum nunc perge palatium,

Fer salutes Caesari ac suis agminibus,

Gloriosis pueris sacrisque virginibus.

5

Via pergens prospera per Christi suffragia

Prona coram Caesare verba dicas talia:

Dic, ut Caesar Karolus perpeti praeconio

Sit sanus, sit longevus, sit felix victoria.

Dic, regnator omnium det sibi subsidium,

10

Confortet, custodiat, dilatet imperium.

Dic, ut fautor fuerat iustis rite regibus,

Fiat Christus Karolo ac sibi fidelibus.

Dic, regales pueri per prolixa spatia

Sint sani, sint longevi salvatoris gratia.

15

Sint coronae regiae digni, dic, honoribus

Felices ac victores genitoris moribus.

Regalibus puellis, dic, fiat sublimitas,

Sit sancta, sit sobria, sit vera virginitas.

Christus amat virgines propter castimoniam,

20

Det, ut illis promiserat, in futuro gloriam.

Dic, protegat dominus sic Francos armigeros,

Regem, clerum, comites, milites belligeros.

Post haec, carta, Caesarem rogato continuo,

De me Christi servulo sit memor exiguo.