Vlceribus plenus uictum petit eger, egenus;

Diues non audit, uictum negat, hostia claudit.

Dum sanies manat, lingens canis ulcera sanat.

Angelus euexit, quem nec uetus instita texit;

5

Purpura quem texit, stridet, cum spiritus exit.

Perpetuo digne miser est et pauper in igne,

Pauperis et miseri qui non uoluit misereri.

Vidit nec nouit nec pauit eum neque fouit;

Nunc uidet et noscit et aquas a paupere poscit.

10

Gaudet, qui fleuit; cruciatur, qui requieuit,

Qui miserum spreuit, quem splendida cena repleuit.

Esurit in pena, quem pauit splendida cena;

Vina bibens quondam sitit et uidet et petit undam

Iudicioque dei datur ignibus, hic requiei.

15

Idibus his Mai miser exemplo Menelai

Flebam nec noram quis sustulerat michi Floram.

Tempus erat florum cum flos meus, optimus horum,

Liquit Flora thorum, fons fletus, causa dolorum.

Nam dum, Flora, fugis, remanet dolor iraque iugis,

20

Et dolor et cure, nisi ueneris, haut habiture.

Cur non te promis, dulcis comes et bene comis,

Vt redeunte pari comites pellantur amari?

Terris atque fretis uagor, expers luce quietis,

Per noctem sonni, capto captiuior omni.

25

Omni captiuo uel paupere uel fugitiuo

Pauperior uiuo. madet et iugi gena riuo

Nec fiet sicca, manus hanc nisi tergat amica.

Si remeare uelis, tunc liber, tunc ero felix;

Maior ero uates quam Scirus siue Phraates,

30

Vincam primates et regum prosperitates.

Quod si forte lates, aliquos ingressa penates,

Exi, rumpe moram; mora sit breuis hic et ad horam.

Alter fortassis precio te transtulit assis,

Vilis et extremus neque nos<cens>, unde dolemus.

35

Vt solet absque mare turtur gemebunda uolare,

Que semel orba pari nec amat neque curat amari;

Sic uagor et reuolo, recubans miser in lare solo,

Qui mutare dolo latus assuetum michi nolo,

Turturis in morem, cui dat natura pudorem,

40

Quod, simul uxorem tulerit mors seua priorem,

Non sit iocundum thalamum temptare secundum.

Set tu mendosa rides me flente dolosa,

Sola nec accumbis, leuibus par facta columbis,

Quis calor in lumbis mutare facit thalamum bis.